Тиздән 9 май - Җиңү көне якынлаша. Гимназия ел саен май аен шундый матур мәшәкатьләр белән каршылый. Сугыш һәм тыл ветераннарын һәм каһарманнарыбызның тол калган хатыннарын  котлап  открыткалар  һәм   бүләкләр   тапшыру  эшен   дә  гимназия   үз  җилкәсенә   алып  башкара.   Бу юлы  да, 5нче  сыйныф  укучылары белән берлектә, сугыштан  кайтмый  калган  яисә  кайткач  та, хәзерге  вакытта  инде  мәрхүм  булган   солдатларыбызның   тол  калган  хәләл  җефетләрен   куандырып  кайттык. Президент,  шәһәр  мэры   һәм  район  администрациясе    тарафыннан   юлланган   открыткаларга  һәм   бүләкләргә  бик  сөенде   әбиләр. Ул бүләкле  открыткаларны   нәкъ  менә яшь  буынның  кулыннан  кабул  итү  дә  икеләтә   сөенеч  өстәде   өлкән  буынга.  Чыннан  да,  без  хәтерлибез   һәм горурланабыз!

Хөрмәтле гимназия идарәсе, укытучылар, укучылар, ата-аналар коллектвы һәм гимназиянең ашханә һәм техник хезмәткәрләре! Сезне 1нче май - Май һәм хезмәт бәйрәме белән котлыйбыз!  

  Әй, күңелле  дә  соң  бергә-бергә  эшләүләре!  Инде  1  ай  дәвамында   гимназия   территориясен  тәртипкә  китерү  белән  мәшгуль   без.   Кояш  елмаеп  торганда  узыша- узыша   эшләүләре   күңелләргә  чиксез  рәхәтлек  бирә,  яз  һавасы   кулга  куәт,  күңелләргә  дәрт  өсти. 

28 апрель көнне китапханәдә юбиляр китаплардан күргәзмә оешты. Мавыктыргыч әдәби сәяхәт барышында 2017 елның юбиляр китаплары белән монда китапханәне читләтеп үтмәгән һәркем таныша ала. Сәяхәт вакытында китапларның әсәрләре буенча куелган викторина сорауларына җавап бирү һәм җавапларга лаеклы кечкенә призлар алу мөмкинлеге дә бар. 

27 апрель көнне гимназиядә күңелле очрашу кичәсе узды. Очрашу барышында журнал хезмәткәрләре «Салават Күперене»ң тарихы, эчтәлеге һәм кызыклы бәйгеләре белән якыннанрак таныштырды. Балаларга көтелмәгән күчтәнәч ясап, Шүрәленең оныгы Шүркәй дә килгән иде. Күп укучылар әлеге очрашудан соң журналны үзләрендә булдырырга карар кылдылар. Очрашу ахырында һәрбер балага «Салават Күпере» журналы бүләк ителде.

Тукай туган көн иртәсе Тукай мәйданына барып, Тукай һәйкәленә чәчәкләр салып кайту белән башланып китте. Тукай  туган  көненә  бүләк  ясагандай,  һава  торышы  да  бүген  бер  дә көйсезләнмәде. 4Б  сыйныфы  укучылары   кулларына  кызыл  канәферләр  тотып, Тукай  исемендәге  гимназия  укучылары булдыкларыннан горур  атлап,  Тукай  туган  көнен  бәйрәм  итүнең  беренче  этабына  ашыкты.  Без  килгәндә  һәйкәл  янын  инде  шактый  халык   уратып  алган  иде.  Кызыл  канәферләргә  уралып  кояш  нурында  коенган  һәйкәл  дә, бүген, ничектер,  җанлырак  булып  тоела  иде... Президент  Р. Н. Миңнеханов,  Дәүләт   киңәшчесе  М. Ш. Шәймиев,  шәһәр  мэры  И. Р. Метшин һ.б.  Дәүләт  эшлеклеләреннән  җыелган   төркем   Тукай  һәйкәленә  чәчәкләр  салган  соңында,  галимнәр,  язучылар  һәм  сәнгать  эшлеклеләре  артыннан  калышмыйча, студентлар  һәм  укучылар  да үзләренең  алып  килгән   кызыл  канәферләрен  Тукай  "аяк  астына" түшәде. Һәйкәлгә  бару  икеләтә  файдалы  булды. Беренчедән, Тукай  туган  көне  уңаеннан  һәйкәлгә  чәчәкләр  салу  вакыйгасы  укучыларның  исләрендә  калса,  икенчедән, президентны,  күп  кенә  артистларны, галимнәрне,  язучы  һәм  шагыйрьләрне   якыннан  күрү  бәхетенә  ирешү  укучыларны  битараф  калдырмады.

Бүген, ягъни 26нчы апрель иртәсендә, гимназия үз укучыларын Тукай шигырьләренә иҗат ителгән җыр-моң  мохитендә  каршы алды һәм көнозын әлеге җырлар һәр тәнәфестә кабатланып торды. Мәгълүмат тактасын хәтерләткән коридор диварындагы телевизордан да бүген бертуктаусыз Тукайның тормыш юлы һәм иҗатыннан өземтәләр, Тукай тормышыннан кызыклы фактлар презентацияләнде. Дәресләр башланырга 10-15 мин. кала, һәр сыйныф җитәкчесе үз сыйныфын җыеп, балаларны Тукайга кагылышлы истәлекләр, аның белән бәйле урыннар белән таныштырды,аудиотасмадан Тукай турында замандашларының истәлекләре тыңланды. Соңрак, 4нче сыйныф укучылары Тукай мәйданына юнәлде. Президент һәм Дәүләт киңәшчесе дә катнашкан чарада үзләренең булмышы белән эчке бер горурлану хисе тойган укучыларыбыз Тукай һәйкәленә чәчәкләр салды. Аннан кайткач, 12сәг. 30 мин.та “ Тукай - безнең күңелләрдә” дип аталган әдәби- музыкаль бәйрәм чарасы башланып китте. Бәйрәмдә  Тукай  айлыгы  дәвамында гимназиядә оештырылган барлык бәйгеләрнең җиңүчеләре катнашты. Шигырь һәм сәхнәләштерү бәйгеләрендә катнашкан һәм җиңгән укучыларга мактау грамоталары һәм истәлекле бүләкләр тапшырылды. 

Бүген бездә “Сәламәт инсан - ил байлыгы” ( «Здоровье каждого - богатство страны») дип аталган Бөтенроссия сәламәтлекне кайгырту проектын тормышка ашыру максатларында сәламәт яшәү рәвешен чагылдырган темаларга лекцияләр укылды. Хәзерге вакытта Казанда Россиянең медик белем бирүче югары уку йортлары арасында“Физик тәрбия һәм спорт - табибның икенчел һөнәре”дип исемләнгән VI спорт фестивале уза икән. Шул форсаттан файдаланып, КДМУның 5курс студенты А. А. Шәйхетдинова һәм Мәскәүдән килгән аспирант егет, спорт медицинасы буенча врач А. А. Шишкин, сәламәтлек һәм спорт белән бәйле темаларга ачыклык кертеп, лекцияләр укып киттеләр.

Апрель - Тукай айлыгы. Тукай һәм Туган тел айлыгы булганлыктан, гимназиядә ай дәвамында бик күп эшләр эшләнә. Шуларның берсе - Тукай шигырьләрен сәхнәләштерү. Бу юлы да һәр сыйныф Тукайның үзенә ошаган бер шигырен сәхнәләштерде.  Шигырьләрдә    кабатланулар   күзәтелсә  дә, сәхнәдәге  куелышта  һич бер-берсен  кабатламаган,һәрберсе  үзләренчә иҗади  якын  килеп  эшләгән  номерлар   булуы  сиземләнде.  Башлангыч  сыйныфларга  аерым  урыннар, урта  һәм өлкән  сыйныфларга  аерым  урыннар  бирелде.  Гадел  хөкемдарлар   урыннарны  түбәндәгечә  хәл  итте:   һәр өченче  урынга  икешәр  сыйныф  лаек  булса, икенче һәм  беренче  урыннарга  исә  берәр   сыйныф  кына  ия  булды. Шулай  итеп,  Тукайның  3  шигырен   сәхнәләштереп , 3се  дә уңышлы  чыккан 2Б  сыйныфы I   урынга (җит. Янбухтина Г.Ф.),  3 В  сыйныфы  II   урынга(җит. Йосыпова Э.Д), 3 Б һәм 1 В  сыйныфлары  III  урынга (җит.  Шиһапова З.Н. һәм  Харитонова А. Е)  лаек  булдылар. Урта  һәм  өлкән  сыйныфлар  арасында 8Б  сыйныфына (җит. Мингалиева Р. Р)  тиңнәр  булмады! 7В, 7А, 8 А   сыйныфлары  белән  җиңел  булмаган  ярышта 8 Б сыйныфы  өстен  чыкты. Беренчелек  тә  аларга  тапшырылды. 7 В  сыйныфы да ( җит. Әхмәдиева  З. Ә.) беренчелекне  беркемгә  дә  бирергә  теләмәгәннәр  иде булса  кирәк,  үз  куллары  белән  эшләнгән, буялган  һәм  бизәлгән  декорацияләр  шул  турыда  сөйли  иде, әмма, ни хикмәт,  7 В  сыйныфына  II  урын  белән канәгатьләнергә   туры  килде. 7 А  һәм   8  А  сыйныфларына  III   урын  тәтеде.

  Бүген безгә Санкт-Петербургтан кунаклар килде. С. Петербург  шәһәре   мәгариф  оешмаларының  директорлары, тәҗрибә  уртаклашу  максатыннан, уку-укыту  барышында   мәгълүмати  технологияләр  куллану  буенча   "түгәрәк  өстәл"  артында  фикер  алышты.