Йөз килограмм макулатура – бер агачны, ә бер тонна макулатура, димәк, дүрт кубометр агачны саклап кала! Еш кына икенчел чималны эшкәртүгә тиешле игътибар бирмибез. Йөзләрчә килограмм макулатура йорт янындагы чүп контейнерына ыргытыла. Гимназиядә исә макулатураны әрәм-шәрәм итүгә юл куелмый. Һәрбер укучы елга ике мәртәбә – көзен һәм язын әлеге изге эшкә үз өлешен кертә. Һәрбер сыйныф макулатура тапшыру көненә алдан әзерләнә: һәр сыйныф җитәкчесе үз укучысының алып килгән макулатурасын үлчәп, аерым бер дәфтәргә теркәп бара. Макулатура тапшыру өчен билгеләнгән аерым бер көндә һәр сыйныф үз макулатурасын китапханәчегә тапшыра. Китапханәче, үз чиратында, һәр сыйныф туплаган макулатураны үлчәп, үз кенәгәсенә теркәп бара. Бу эштә гимназия үзидарәсенең президент һәм министрлары да катнаша: дәфтәрнең тимер энәләрен, китапларның тукыма тышчасын, тимерчыбык каптырмаларын алдан ук кубарырга кирәк. Бер мәртәбә кулланыла торган кәгазь савытлар, йомырка кабы, янган яки юешләнгән кәгазь, “ялтыратылган” журналлар макулатурага кабул ителә алмый... Ахыр килеп, спорт белән шөгыльләнүдән чыныгу алып өлгергән өлкән сыйныфта укучы егетләребез,  җыелган макулатураны махсус килгән машинага  җитез генә  төяп озата... 

Сәлкеш, әйдаман, башҗитәк...Син  кайсы телдә  сөйләшәсең, дисеңме?! Бу серле атамалар "Сәләт" аланына йөрүче егет-кызларга хас.Сәләт - Татарстан Республикасы балалары һәм яшьләренең интеллектуаль иҗат потенциалын ачу һәм үстерү берләшмәсе.  Бүгенге  көндә  мәктәп  укучыларыннан  алып, югары  уку  йорты  студентларына  кадәр  СӘЛКЕШ булу  мөмкинлеге  бар. Теләгеңдә  булса, сәлкешләр  сафына  син дә кушыл! Сәләтле  сәлкеш, әйдаман, башҗитәк  бул!

Казан шәһәре муниципаль берәмлеге башкарма комитеты мәгариф идарәсенең Вахит һәм Идел буе районы мәгариф бүлеге боерыгы нигезендә 1.04. - 31.05  көннәре аралыгында белем  бирү  оешмалары территориясендә  язгы  өмәләр  оештырылып, ике  ай  дәвамында  чистарту,  агарту - төзекләндерү  эшләре   алып  барылырга  тиеш.29нчы  апрель - ӨМӘ КӨНЕ  буларак  игълан  ителгән. Гимназия  укучылары  исә, рәсми рәвештә  игълан  ителгән   әмерне  көтеп  тормастан, гимназия  мәйданын  озын -озак кыштан  калып, кар  эрүгә  "баш  калкыткан"  чүп-чардан  арындырырга  кереште. Әдәбият  дәресләрендә  өйрәнгән  мәкаль-әйтемнәрнең эчке бер  мәгънәсенә технология дәресләрендә әнә  шул  рәвешле төшенә  укучылар. XXI гасыр   балаларына  мөнәсәбәтле  хезмәт  тәрбиясенең   соңгы планда  булмавы  куандыра, әлбәттә. 

Язгы каникулларның тәмамлануы никадәр генә сагышландырмасын, соңгы чиреккә аяк басуыбыз күңелләргә шулкадәр үк шатлык та өсти. Табигый булмаган тынлыктан гаҗизләнеп калган гимназия балаларны янәдән үзенең иркен, якты, җылы  уку  бүлмәләренә  кабул итте . Иң  кыска, әмма  иң җаваплы IV чирекне дә  уңышлы  тәмамлап, җәйге каникулларны күңелле  каршыларга насыйп  булсын. Хәерле  сәгатьтә !  

"Язгы алан"да узган вакытны укучылар бик күңелле үткәрә. Алдан планлаштырылган план буенча алар әле бер җиргә, әле икенче җиргә сәяхәткә чыгып китәләр.

Халык мәкалендә әйтелгәнчә, акыл – казна, күңел – йозак, тел – ачкыч. Бу ачкыч безгә башкалар күңелен аңларга, акылыбызның камиллеген, уй-фикерләребезнең ни дәрәҗәдә югары булуын күрсәтергә ярдәм итә. “Халыкның теле – аның бөтен рухи тормышының иң яхшы, беркайчан да шиңми, мәңге яшәреп тора торган иң матур чәчәге. Телдә... аның Ватаны җанлы рәвештә гәүдәләнә”, – дип язган К.Д. Ушинский. Рәсәй күләмендә һәм республикабызда игълан ителгән ЭКОЛОГИЯ  ЕЛЫна һәм  КФУда  ЛОБАЧЕВСКИЙ ЕЛЫна багышланган "Фән сукмагы – 2017: Табигать. Кеше. Акыл” дип исемләнгән шәһәр күләмендә быел XII тапкыр уздырылучы укучылар фәнни-гамәли конференциясендә чыгыш ясап,  “Тел культурасы һәм күңел гармониясе проблемасын яктыртуга багышланган иң яхшы доклад” номинациясендә III урын алган 9 Б сыйныфы укучысы З. Зиятдинованы чираттагы уңышы белән котлыйбыз! Рус теле укытучысы О. В. Терентьевага сәләтле балалар белән эшләүгә керткән өлеше өчен рәхмәтебезне җиткерәбез. 

Гимназиянең җыелма командасы , киокусинкай каратэ төре, катнаш көрәш һәм спортның башка төрләре белән ныклап шөгыльләнүне үз иткән укучыларыбыз үзләренең уңышлары белән даими куандырып торалар. Сез алар белән "Гимназия хәбәрләре" газетасының "Без булдырабыз" сәхифәсендә якыннанрак та таныша аласыз. Ә бүген без яңа спортсменыбыз турында хәбәр итәсебез  килә, чөнки РӘСӘЙ КҮЛӘМЕНДӘ ҖИҢҮләр көндә булмый ! Укучыбыз Татарстан  җыелма  командасы исеменнән теннис спорт  төре буенча  Россия күләмендә  башкалабыз  данын  яклаган! 14-19  март көннәрендә  Самарада  узган   ярышта финалга  чыккан  Краснодар  командасын  җиңеп, 2:1  исәбе  белән җиңү яулый  Татарстан  командасында  уйнаган   гимназиябезнең  чибәр кызы!  Алтын  медальгә  ия  булып  Россия  беренчелегенә  чыккан  укучыбыз  белән  без, чын мәгънәсендә, горурланабыз!Татарстанның  йөз аклыгы  булган кызлар  командасын  спорт  өлкәсендәге  уңышлары  белән  котлыйбыз   һәм  киләчәктә   Универсиада  һәм  Олимпиадаларда дөньякүләм  мәртәбәләргә  ирешүләрен  теләп  калабыз.

"Илебездә, телебездә, күңелләрдә Тукай мәңгелек" район бәйгесендә чыгыш ясаган укучыларыбыз арасында ҖИҢҮЧЕЛӘР билгеле булды. "Авторлык шигырьләрен башкару" номинациясендә 2 укучыбыз - 4 Б сыйныфы укучысы Э.Закирова  (II урын)  һәм  8 Б сыйныфы укучысы Л. Шәмеева ( тәхәллүсе -Лилия Шәми , III урын)  үзләренең   иҗат җимешләренә  бәрабәр  лаеклы  бәягә ия  булдылар.  Котлыйбыз!