9нчы октябрьдән 15нче октябрьгә кадәр гимназиядә Халыкара мәктәп китапханәләре көненә әзерлек кысаларында “Китапны сакла” дип исемләнгән рәсем конкурсы булып узды. Конкурсның максаты – китапларга сакчыл караш тәрбияләү. Конкурста иң актив катнашучылар 4б сыйныфы укучылары булды. Аларның сыйныф җитәкчеләренә һәм ата-аналарына зур рәхмәтебезне белдерәбез.

Бүген “Татар яшьләре” төркеме , ягъни 10нчы сыйныф укучылары, гимназиядә “Елмай” акциясе үткәрде. Алар матур сүзләр һәм теләкләр язылган “кояш” билгесен гимназия укучыларына һәм укытучыларына тараттылар. Максатлары: гимназия укучылары арасында татар телен камил белүчеләр санын үстерү һәм бер-берсенә карата яхшы мөнәсәбәтләрен, дуслыкларын арттыру иде. Бу эш алга таба да дәвам ителәчәк.

14 октябрьдә «Электрон» спорт залында 1 нче гимназия укучылары (8б, 9а сыйныфы укучылары) һәм татар телендә белем бирүче 27 нче гимназия укучылары арасында мини-футбул буенча ярыш уздырылды. Бу ярышта гимназия спортчылары зур җиңүгә иреште: 11/2. Җиңүчеләрне кайнар котлыйбыз.

22 нче сентябрьдән 15 нче октябрьгә кадәр гимназиядә Бөтенроссия олимпиадасының мәктәп туры бара. Бүген гимназия укчылары география һәм информатикадан олимпиада биремнәрен үтәде.

4 нче октябрьдән 10 нчы октябрьгә кадәр гимназиядә “Космос серләре” дигән тема буенча Бөтендөнья космос атналыгы узды. Атналык барышында укучылар, Adobe Photoshop график редакторын кулланып, “Компьютер экранында йолдызлы күк йөзе» дип исемләнгән иҗади эш башкардылар.

8 нче октябрь көнне гимназиянең Үзидарә советы чираттагы җыелышын үткәрде. Җыелыш барышында укучылар Үзидарә советының сентябрь аенда башкарылган эшләренә анализ ясадылар һәм октябрь аена төп эш юнәлешләрен билгеләделәр.

Бүген гимназиянең актлар залында Укытучылар көненә багышланган концерт үтте. Укучылар чыгышы алдыннан гимназия директоры Гөлфия Гаязовна мөгаллимнәрне һөнәри бәйрәмнәре белән котлады, аларга сәламәтлек, бәхет, уңышлар теләде, гимназиядә көндәшлеккә сәләтле укучылар тәрбияли алырлык укытучылар эшләвен ассызыклады. Гимназиядә белем алучы нәфис сүз осталары, җырчы, биюче малай һәм кызларның чыгышы мөгаллимннәр өчен зур бүләк булды.

30 нчы сентярьдә 1 нче татар гимназиясе укучылары 36 ел мәктәптә тарих укыткан мөгаллимә Флюра ханым Калмурзина белән очрашты. 85 яшьлек Флюра ханым танылган чигүче, аның милли хәзинәләре дөнья музейларында урын ала. Очрашуны түгәрәге җитәкчесе, танылган тележурналист Флюра Галимҗановна Абдуллина оештырды. Флюра ханым Калмурзина турында тулырак мәгълүматны “Гимназия хәбәрләре” газетасында укырга мөмкин булачак.

30 нчы сентябрь – 2 нче октябрь көннәрендә Вахитов һәм Идел буе районнарының белем бирү оешмаларында кабинетлар конкурсы бара. Башлангыч сыйныф укытучылары бу бәйгедә үзләренең эш тәҗрибәсе белән уртаклаша. Беренче квалификацион категорияле башлангыч сыйныф укытучысы Нуриева Гөлнара Нурисламовна жюри әгъзаларын укыту һәм тәрбия барышында файдаланылган матди-техник мөмкинлекләр, дидактик материаллар, дәрестән тыш чаралар оештыру һәм бай эш тәҗрибәсенең башка яклары белән таныштырды.

24 нче сентябрьдә Вахитов һәм Идел буе районнарының белем бирү оешмаларында укучылар арасында җиңел атлетика буенча ярышлар уздырылды. 9А сыйныфы укучысы Габидуллин Нур район этабында җиңү яулады һәм гимназия, район данын шәһәркүләм ярышта яклаячак. Аңа зур уңышлар телибез!.