Бүген гимназиядә мини-футбол уены буенча ярышлар үтте. Безнең гимназия командасы 3:1 исәбе белән 13 нче номерлы мәктәп командасын җиңеп чыкты. Укучыларны җиңүләре белән котлыйбыз һәм алдагы уеннарда да уңышлар теләп калабыз.

Гимназиябездә Өлкәннәр көненә карата 1-6 сыйныф укучылары арасында бәйге игълан ителгән иде. Бәйгенең беренче этабы сыйныфларда үтсә, шушы көннәрдә һәр сыйныф иң яхшы дип саналган проект эшен жюрига тәкъдим итте. Проект эшләре һәрберсе үзенчәлеге белән аерылып тора иде. Аларның һәммәсенә дә укучыларның күңел җылысы салынган. Дәү әти һәм дәү әниләренә карата язылган җылы сүзләр, шигырьләр, үз куллары белән ясалган сурәтләр жюри тарафыннан игътибарсыз калмады. Нәтиҗәдә урыннар башлангыч һәм уртанчы сыйныфлар арасында бүленде. Укучыларга эчтэлекле чыгышлары өчен рәхмәт сүзләрен җиткереп, киләсе бәйгеләрдә дә актив катнашуларын теләп калабыз.

Буллинг - чагыштырмача яңа термин. Нәрсә ул? Буллинг - ул социаль агрессия тибы, индивидуаль яки төркем тарафыннан озак вакыт физик яки психик көчләү. Баланы  буллингны танып белергә һәм аңа дөрес җавап бирергә өйрәтү мөһим. Моның өчен кинотерапия инструментлары бик яхшы туры килә. Буллингны профилактикалау максатында, 7 нче сыйныф укучылары “Чучело” видеофильмын карадылар һәм әлеге тема турында фикер алыштылар.

Бездә “Балалар – планетада тынычлык өчен!” девизы астында рәсем һәм кул эшләре конкурсы үтте. Укучылар ачык төсләр белән сурәтләнгән рәсемнәрендә, кул эшләрендә Җир шарында тынычлык, татулык булуын теләүләрен күрсәттеләр.

“Финанс грамоталылыгы буенча онлайн – дәресләр” проектының көзге сессиясе кысаларында гимназиядә “Кибермошенниклардан ничек сакланырга? Киберкиңлектә куркынычсызлык кагыйдәләре” темасына онлайн – дәрес үтте.

Ел саен, уку елы башлану белән, 7-11 сыйныф укучылары социаль-психологик тест үтәләр. Әлеге тест укучыларның авыр тормыш хәлендә психологик тотрыклылык дәрәҗәсен ачыкларга ярдәм итә. Быел да укучылар социаль-психологик тест сорауларына җавап бирделәр.

Укытучылар көне бу уку елында безнең гимназия өчен аеруча истәлекле булды, чөнки иң мөхтәрәм мөгаллимнәребез бүләкләнде.
Россия Федерациясе Мәгариф министрлыгының "Мәгариф отличнигы" билгесе белән информатика укытучысы Багаутдинова Резеда Рашат кызы бүләкләнде.
Россия Федерациясе Мәгариф министрлыгының Мактау грамотасы белән татар теле һәм әдәбияты укытучысы Хөснетдинова Эльмира Рөстәм кызы бүләкләнде.
Татарстан Республикасының "Мәгарифтәге казанышлары өчен" күкрәк билгесе белән тарих һәм җәмгыять белеме укытучысы Әхмәтшина Алсу Тәлгать кызы бүләкләнде.
Татарстан Республикасы Мәгариф һәм фән министрлыгының Мактау грамотасы белән тәрбия эшләре буенча директор урынбасары Хәбирова Айгөл Эрнст кызы бүләкләнде.
Хөрмәтле укытучыларыбыз!
Сезне чын күңелебездән котлыйбыз. Алга таба да иҗади, фәнни уңышлар, гаилә бәхете, сәламәтлек телибез.

Бүген гимназиядә “Экстремизмны профилактикалау” темасына сыйныф җитәкчеләренең киңәшмәсе узды. Чарада сыйныф җитәкчеләренә укучыларны сәламәт яшәү рәвешенә тарту һәм экстремизмны кисәтү эшен үткәрү буенча тәкъдимнәр бирелде.

5 нче октябрь Укытучылар көне буларак билгеләп үтелә. Безнең гимназиядә иң мөлаем, иң сабыр, иң мәрхәмәтле, иң тәҗрибәле укытучылар йөзләгән балага белем бирә. Белем генә биреп калмый, ә укучыларны мөстәкыйль, намуслы һәм гадел булырга өйрәтә, иң яхшы сыйфатларны тәрбияли.

Хөрмәтле, укытучыларыбыз! Сезне һөнәри бәйрәмегез белән чын күңелдән тәбрик итәбез. Фидакарь хезмәтегез, югары һөнәри осталылыгыз, сабыр, ярдәмчел булуыгыз өчен тирән ихтирамыбызны белдерәбез. Сезгә авыр, әмма җаваплы һәм мактаулы эшегездә зур уңышлар, сабырлык, саулык-сәламәтлек, бәхет - шатлык, озын гомер телибез. Эшләү дәртегез беркайчан да сүрелмәсен, атачак таңнарыгыз – аяз, туасы көннәрегез – кояшлы, төннәрегез – тыныч булсын. Мәктәптә үткәргән һәр көнегез балалар белән аралашудан шатлык китерсен!

Халыкара укытучылар көне уңаеннан, гимназиябездә бәйрәмгә багышланган радиоэфир үтте. Көне буе радиодан укытучыларга багышланган матур шигырьләр, котлау сүзләре, җылы теләкләр һәм күңелле җырлар яңгырады. Һәр сыйныф мөгаллимнәргә бәйрәм котлавын һәм рәхмәт сүзләрен үзләре әзерләгән иҗади номер аша җиткерде. Гимназиядә җылы, бәйрәмчә мохит хөкем сөрде. Укытучыларны бәйрәм белән котлап, шатлыклы һәм якты көннәр, рәхмәтле укучылар һәм игелекле хезмәттәшләр телибез!