Яңа уку елы башлану белән гимназиябездә яңа тормыш башлана. Традицияләрне дәвам итеп, быел да электрон газета, иртәнге зарядка һәм мәктәп радиосы беренче көннән үк үз эшләрен башлап җибәрделәр.

Бүген мәктәп радиосы, яңа уку елында беренче тапкыр, эфирга чыкты. Әлбәттә инде, беренче булып, 11А сыйныф укучылары чыгыш ясадылар. Алар укытучыларны, укучыларны яңа уку елы башлану белән котлап, үткән атна яңалыклары белән таныштырдылар һәм киләсе атнада булачак чаралар турында искәрттеләр. Шулай ук куркынычсызлык кагыйдәләре буенча мәгълүмат бирделәр.

Бүген гимназиябездә Бөтенроссия куркынычсызлык дәресе үтте. Укытучылар һәм укучылар, гимназия хезмәткәрләре төрле ситуацияләрдә үз – үзләрен тоту кагыйдәләрен искә төшерделәр. Алар тиешле барлык таләпләрне дә үтиләр.  Шәхси куркынычсызлык – һәрберебезнең үз кулында икәнен онытмасак иде. Игътибарлы булыйк, бер-беребезне саклыйк!

“2021 елда Туган телләр һәм Халыклар бердәмлеге елы кысаларында Татарстан Республикасы территориясендә яшәүче халыкларның телләрен, гореф – гадәтләрен, мәдәниятләрен саклап калуга һәм үстерүгә юнәлдерелгән проектларны гамәлгә ашыруда муниципаль мәктәпкәчә белем бирү һәм муниципаль гомуми белем бирү оешмаларына ярдәм итү” грантының җиңүчеләр исемлегендә безнең гимназиябез дә бар. Әлеге зур җиңү белән һәммәгезне дә котлыйбыз һәм киләчәктә дә зур уңышлар теләп калабыз.

Янгын куркынычсызлыгы, аның турында белем - балалар тәрбияләүдә мөһим роль уйный. Янгын теләсә кайсы урында һәм теләсә кайсы вакытта килеп чыгарга мөмкин. Укучылар да бу афәткә әзер булырга тиеш. Аларга бу бәла - казаны булдырмас өчен үзеңне ничек тотарга кирәклеген белергә кирәк. Шул максаттан, башлангыч сыйныфлар янгын куркынычсызлыгы почмагы әзерләделәр. Әлеге почмакларда укучылар өчен файдалы мәгълүмат тупланган. Бәла-каза китереп чыгармас өчен ниләр эшләргә ярамый, ә килеп чыккан очракта иң беренче нәрсә эшләргә, үзеңне ничек тотарга икәнлеге аңлатып язылган.

Иминлек айлыгы кысаларында, укучыларга “Тыныч һәм хәрби чордагы гадәттән тыш хәлләр шартларында үз-үзеңне тоту кагыйдәләре” дип аталган белешмәлекләр таратылды. Әлеге белешмәлекләрдә гадәттән тыш хәл вакытында укучыларның эш-гамәлләре эзлеклелеге күрсәтелгән.

Ел саен, 3 нче сентябрь көнне, Россиядә террорчылыкка каршы көрәштә бердәмлек көне билгеләп үтелә. Бүген гимназиябезнең барлык сыйныфларында “Беслан кайгысы кайтавазы” (“Эхо Бесланской печали”) дип аталган хәтер дәресләре үтте. Биредә моннан 17 ел элек Беслан шәһәрендә булган фаҗигале вакыйгалар турында сүз алып барылды һәм әлеге фаҗиганең корбаннары искә алынды.

 Ул чакта, 2004 нче елның 1 нче сентябрендә, яңа уку елына сөенүче балалар ата-аналары белән, кайгы - хәсрәт килүен сизмичә, Белем көненә мәктәпкә җыелганнар иде. Җинаятьчеләр 1 нче мәктәпкә үтеп кереп укчыларны, аларның әти - әниләрен һәм укытучыларны әсирлеккә алалар һәм мәктәп  бинасында өч көн буе 1128 кешене бикләп тоталар. Әлеге террорчылык актының нәтиҗәсе бик аяныч - теракт нәтиҗәсендә өч йөздән артык кешенең,  шул исәптән 186 баланың гомере өзелгән иде.

Бүген, Беслан һәм барлык террор актлары корбаннарын искә алып, без терроризмга каршы тору ниятебез белән бердәм. Толерантлык һәм бер -береңне хөрмәт итү генә терроризмның үсүен кисәтү мөмкинлеге бирәчәк. Халыклар дуслыгы, үзара хөрмәт барлык көрәшләрдән дә өстен булырга тиеш. Террорчылык корбаннарын онытырга безнең хакыбыз юк.

Яңа уку елы белән беррәттән, гадәттә, иминлек айлыгы да башланып китә. Иминлек айлыгы кысаларында, гимназиядә күп чаралар оештырыла. Бүген “Гадәттән тыш хәлләр һәм кеше иминлеге” темасына сыйныф сәгатьләре үтте. Биредә укучылар гадәттән тыш хәл килеп туганда үз-үзеңне тоту кагыйдәләре һәм  саклану чаралары турында искә төшерделәр.

Бүген гимназиядә ата-аналар җыелышлары узды. Чара “2021-2022 нче уку елында гимназиядә белем һәм тәрбия бирү процессын оештыру” темасына үткәрелде. Җыелышта яңа уку елына планнар турында һәм асоциаль күренешләрне кисәтү турында сөйләнде. Әти-әниләр үзләрен борчыган сорауларга, сыйныф җитәкчеләре белән бергәләп, җавап эзләделәр.

Белем көне... Бу көн – тәүге тапкыр кыңгырау тавышын ишетүче беренче сыйныф укучылары, бер елга олыгаеп килгән шәкертләр, аларны колач җәеп каршы алучы мөгаллимнәр, сөенеп һәм борчылып балаларын  озатып калган әти – әниләр өчен зур бәйрәм. 1сентябрьдә, иң истәлекле һәм дулкынландыргыч көннәрнең берсендә, бик күпләр өчен тормышның яңа сәхифәсе, танып-белү, иҗади уңышлар чоры башлана.

Бездә дә бүген, белем бәйрәме уңаеннан, тантаналы линейка узды. Быел беренче тапкыр безнең мәктәп бусагасын 85 бала укучы буларак атлады. Бүгенге көннән алар өчен мавыктыргыч, кызыклы белем дөньясы үзенең ишекләрен ача.

Яңа уку елында укучыларга зур уңышлар, яңа казанышлар, яхшы билгеләр, ышанычлы дуслар, күңелле мәктәп тормышы телибез. Ә укытучыларга түземлелек, сабырлык, ныклы ихтыяр көче, энергия һәм сәламәтлек юлдаш булсын. Хәерле сәгатьтә! Имин еллар, якты юллар сезгә!

Җәйнең соңгы атнасын уздырабыз, тиздән гимназиядә укулар башлана. Укытучылар белем бирергә әзерләнсәләр, укучылар беренче кыңгырау – белем бәйрәменә номерлар өйрәнәләр. Бәйрәмдә белем көне турында җырлар, дәртле биюләр, матур шигырьләр булыр дип көтелә.