Бүген 9 нчы сыйныфта гимназия психологы “Имтиханнарга ничек әзерләнергә?” дип аталган темага әңгәмә үткәрде. Укучыларга әлеге чара бик ошады.

Бүген 2 нче сыйныфта “Юл йөрү кагыйдәләре” темасы буенча “Своя игра” уен-презентациясе үтте. Укучылар экранда бирелгән сорау-биремнәргә җавап биреп, юл йөрү кагыйдәләрен иң яхшы белүче укучыны ачыкладылар. Укучыларга уен бик ошады.

Дөньяда ике бертөсле кеше юклыгы берәүгә дә сер түгел. Без бер-беребездән тышкы кыяфәт, характер, үз-үзеңне тоту манерасы, башка кешеләргә карата мөнәсәбәтебез белән аерылып торабыз. Безнең гимназиядә «Без барыбыз да төрле – бу безнең байлыгыбыз» дип исемләнгән иншалар бәйгесе үтте. Укучылар иншаларында «толерантлык» төшенчәсенә карата үз карашлары турында сөйләделәр.

Юл йөрү кагыйдәләрен 1 нче сыйныф укучылары да искә төшерделәр. Алар бүген викторинада көч сынаштылар. Нәни укучылар, төркемнәргә бүленеп, төрле бәйгеләрдә катнаштылар. Викторина бик кызыклы үтте. Әле нәни булсалар да, укучылар сынатмадылар, барлык бәйгеләрдә дә актив катнаштылар.

Бүген 5 нче сыйныфта гимназия психологы катнашында сыйныф сәгате үтте. Чарада психолог укучыларга “Үзеңне ничек ышанычлы тотарга?” дигән темага мәгълүмат бирде.

Бүген башлангыч сыйныфларда “Юл йөрү кагыйдәләре турында без нәрсә беләбез?” дип аталган дидактик уен үтте. Укучылар, вариантларга бүленеп, кызыклы биремнәр үтәделәр, табышмаклар ярдәмендә транспорт төрләре белән таныштылар. Кызыклы уен укучыларга светофорның әһәмиятен аңларга ярдәм итте һәм алар бик теләп светофорны рәсем дәфтәрләрендә дә ясадылар.

Хәзерге чорда яшь буынның сәламәтлеген ныгыту мөһим мәсьәлә булып тора. Һәрбер кеше балачактан ук үзенең эчке халәтен яхшы сиземләргә һәм сәламәтлеге турында кайгырта белергә тиеш. Шул максаттан, бездә физкультура дәресләре мавыктыргыч һәм кызыклы итеп үткәрелә.

Бу атнада гимназиядә теннис дәресләре башланып китте. Теннис уйнарга өйрәнү балалар өчен бик файдалы. Ул физик активлыкны үстерүдән тыш, шәхси үсешкә дә ярдәм итә, дисциплина һәм характер тәрбияләргә мөмкинлек бирә. Безнең укучылар теннис дәресләренә бик теләп йөриләр.

Иминлек айлыгы кысаларында, укучыларның юл йөрү кагыйдәләре буенча белемнәрен тикшерү, светофордан һәм юл билгеләреннән дөрес итеп файдалана белү күнекмәсен ныгыту максаты белән, 3 нче В сыйныфында “Юл билгеләре иле” дип аталган уен-дәрес үтте. Дәрес барышында укучылар юл йөрү кагыйдәләрен, юл билгеләрен искә төшерделәр, кызыклы сорау-табышмакларга җавап эзләделәр. Соңыннан бергәләп кул эшләре эшләделәр. Дәрес бик кызыклы үтте.

11 нче сентябрь көне – Бөтендөнья аеклык көне билгеләп үтелә. Шул уңайдан, гимназиядә өлкән сыйныф укучылары белән әңгәмәләр үтте. Аларның төп максаты – укучыларны сәламәт яшәү рәвешенә өндәү һәм алкогольдән баш тартуга юнәлдерү, эчкечелек чиренең фаҗигасен аңлату. Әңгәмә барышында укучылар сәламәт тормыш алып баруның уңай якларын билгеләп үттеләр.

“Көзге  игелек атнасы” акциясе гимназиядә үткәрелгән “Хәйрия ярминкәсе” белән төгәлләнде. Әлеге чарада барлык укытучылар һәм укучылар актив катнашты. Ярминкәдә төрле сувенирлар, кул эшләнмәләре алырга мөмкин иде. Ярминкә оештыруда катнашкан һәркем мохтаҗларга ярдәм итүдә үз өлешен кертте.

“Игелек атнасы”нда үткәрелгән чаралар укучыларны игелекле, мәрхәмәтле булырга өйрәтүдә бер зур адым булып тора. Балалар мәктәп яшеннән үк әлеге төшенчәләрнең тормышта нинди мәгънәгә ия булуын белеп үсәргә тиеш.