Җәй-уеннар, күңел ачулар, бер ел эчендә тупланган киеренкелекне бетерү, тотылган көчләрне тулыландыру, сәламәтлекне торгызу вакыты. Мәктәп лагерьларын оештыру-җәйге чорда мәктәп укучылары белән эшләүнең иң кызыклы һәм мөһим төрләренең берсе. Лагерь балаларны савыктыру һәм тәрбияләүнең бик мөһим миссиясен башкара.
Безнең гимназиядә дә ел саен июнь аенда кече мәктәп яшендәге балалар өчен җәйге лагерь эшли. Бу елны ул 31 нче майдан башланып китәчәк.

9 нчы сыйныф укучылары 27-28 нче май көннәрендә математика фәненнән ОГЭ тапшырдылар. Безнең гимназиядә дә әлеге экзаменнар үтте.

Чыгарылыш 9 нчы сыйныф укучыларының бу соңгы имтиханы. Аларга хәзер нәтиҗәләрне генә көтәргә кала. 

Уку елы тәмамлану белән чыгарылыш сыйныф укучыларының төп сынаулары - имтиханнар бирү дә башлана. Бездә дә 24-25 нче майларда 9 нчы сыйныф укучылары рус теленнән Төп дәүләт имтиханын (ОГЭ)  тапшырдылар. Укучыларның әле алда тагын бер экзаменнары бар, без аларның уңышлы тапшыруларын телибез.

Бүгенгедәй минем хәтеремдә

Иң беренче белем бәйрәме.

Бер кулымда әни кулы иде,

Ә берсендә – чәчәк бәйләме.

Тәүге звонок чылтырады безгә,

Ачты олы белем юлларын.

Мәктәп дөньясына рәхим ит дип,

Укытучым сузды кулларын.

Бүген гимназиябездә “Соңгы кыңгырау” бәйрәме үткәрелде. Соңгы кыңгырау мәктәптә соңгы мәртәбә чылтыраса да, олы юлга чакырган беренче кыңгырау ул.

Хөрмәтле чыгарылыш сыйныф укучылары, аларның сыйныф җитәкчеләре, укытучылары һәм әти-әниләре! Сезне бүгенге зур әһәмияткә ия көн - соңгы кыңгырау чылтыраган көн белән тәбрик итәбез!

Нәкъ менә чыгарылыш сыйныф укучылары өчен әлеге кыңгырау мәктәпләрдә бүген соңгы мәртәбә чыңлый. Мәктәп күңелегезгә никадәр якын яисә ерак булуына карамастан, бу көн, сыйныфташлар һәм мәктәп еллары күңелләрдә гомергә сакланачак. Чыгарылыш сыйныф укучылары, без сезгә уңышлар һәм якты киләчәк телибез!

Укучыларыбыз яңадан-яңа уңышлары белән сөендереп тора. Укучыбыз Мухаметшин И. татар телендә “Җиңү җыры” шәһәр әдәби конкурсының “Автор җыры” номинациясендә җиңү яулады һәм 1 нче дәрәҗәле дипломга лаек булды. Аның җитәкчесе – музыка укытучысы Мустафина Ф.Ш. мактаулы грамота белән бүләкләнде. Без алар белән горурланабыз!

21 нче май көнне балаларның күңелләрендә иң якты,иң матур хәтирә булып сакланып калачак чыгарылыш – башлангыч сыйныф белән саубуллашу узды. 4 нче сыйныфны тәмамлаган укучылар бүген сабый чакның бер баскычыннан югарыга күтәрелделәр. Алар сихри балачак мизгелләре,беренче хәрефләр,килеп чыкмаган мәсьәләләр, буталчык кагыйдәләр иленнән ышанычлы адымнар белән чыгып киләләр. Хөрмәтле укучыларыбыз, алга таба да җитез, акыллы,максатчан булып калыгыз!

Бүген безнең гимназиябездә күңелле мөхит хөкем сөрә, чөнки укучыларыбыз кулларына мактаулы грамоталар алдылар. Ел буе укуда, мәктәп тормышында актив булган, җиңү яулаган балалар бүләкләнде. Алар төрле конкурсларда, чараларда, спорт ярышларында катнашканнар.  Укучыларыбыз гимназиядән тыш үткәрелгән чараларда да актив, күп кенә призлы урыннарга да ия булдылар. Без үзебезнең укучыларыбыз белән горурланабыз!

4 нче чирек һәм 2020-2021 нче уку елы да тәмамланырга күп калмады. Барлык сыйныфлар да инде йомгаклау конроль эшләрен язалар, ә чыгарылыш сыйныфлар имтиханнарга әзерләнәләр. Бүген дә 9 нчы сыйныф укучыларының күбесе рус әдәбияты һәм җәмгыять белеменнән контроль эшләр башкардылар. Без аларга имтиханнарны уңышлы бирүләрен телибез.

Бүген, 17 нче май көнне, 7 "Б" сыйныфы укучылары мәктәп радиосында чыгыш ясады. Алар уку елы ахыры җиткәне, алга таба бөтен көч белән тырышырга кирәклеге турында әйтеп үттеләр. Шулай ук алдагы уку атнасы рейтингы , яңалыклар турында да сөйләнелде.

Үлемсез полк - Россиядә һәм Бөек Ватан сугышында катнашкан башка илләрдә Җиңү көненә багышланган чара. Ул  9 май бәйрәменең тагын бер күркәм традицияләренең берсе. Быел бу чара онлайн форматта уза. Ләкин ничек кенә булмасын, безгә аяз күк йөзе, кояшлы көннәр, тыныч төннәр бүләк иткән әби-бабаларыбызны онытырга хакыбыз юк! Бөек Җиңү көненә бик күп еллар узса да, алар мәңге безнең хәтердә! Шуңа  укучыларыбыз да “Үлемсез полк” акциясендә бик теләп катнаштылар.