Дүшәмбе 14 сентябрь көнне мәктәпкә әзерлек төркеме балалары тәрбияче Хуснулина Гүзәл Габделхәй кызы белән берлектә юл йөрү кагыйдәләрен өйрәнү буенча "Юл билгеләре иленә сәяхәт" исеме астына ачык чара үткәрделәр. Юл йөрү кагыйдәләре өйрәнү буенча балаларның белемнәрен системалаштыру, билгеләрнең күп төрле булуын, һәрберсе транспорт йөртүчеләргә, җәяүлеләргә аерым бер информация аңлатуын, шуларны белеп, төгәл үтәгән вакытта юлларда хәфев-хәтәрсез йөрергә мөмкин булуын балаларга җиткерү максатыннан алып барган эшчәнлектә ЮХИДИ хезмәткәрләре Насибуллин Илнур Дамир улы, Закиров Динар Рамил улы, район мәгариф бүлеге вәкиле Сабирова Эльвира Фаридовна катнаштылар. Балаларга юл йөрү кагыйдәләре төшендерү буенча, машинада барганда балалар нинди креслога утырып йөрергә тиешлеге турында видеороликлар күрсәтелде. Илнур Дамир улы балалар белән юл аркылы чыгу буенча практик эшчәнлек алып барды, очрашу истәлекле фотога төшү, балаларга буклетлар тарату белән тәмамланды.

15 сентябрь көнне уртанчылар төркемендә әти-әниләр җыелешы булып узды. Физик тәрбия бирүче тәрбияче Әүхәдиева Нурания Әюп кызы әти-әниләрне балалар бакчасы тормышы белән тирәнтен таныштыру максатыннан иртәнге гимнастика күрсәтте. Балаларның хәрәкәт активлыгын үстерүче, көне буена балаларга уңай тәэсир бирүче чара барышында  балаларның  үсеп, тиешле күнекмәләрне бердәм, тәрбиячене тыңлап,  күнегүләрне дөрес башкарулары әти-әниләргә хуш килде. Эшчәнлек барышында һәр әти-әни үз нарасыеның катнашуын кызыксынып күзәтте. Саматова Ләйлә Исмәгыйль кызы балаларның яшь үзенчәлекләре, уртанчылар төркемендә балалар үзләштерергә тиешле күнекмәләр, бурычлар белән таныштырды.

“Туган илем”

Нинди матур минем

Туган илем,

Җир шарында тиңдәш юк аңар!

Киң кырларда үсә мул игеннәр,

Шаулап ага озын елгалар.

Ал чәчәкләр үскән болыннарда

Уйнап-көлеп йөри балалар,

Сандугачлар белән бергә кушылып,

Ил шатлыгын җырлыйлар алар.

                             Әхмәт Исхак

Балаларны туган як табигате белән таныштыруны дәвам итү. Татарстан Республикасының урманнарга, елга-күлләргә бай булуын, күп төрле казылмалар барлыгын аңлату. Тере һәм тере булмаган табигать турында белемнәрен тирәнәйтү, мул табигатьнең кеше тормышында әһәмиятен аңлату, табигатьнең һәм аның байлыкларына сак караш тәрбияләү, кешеләр тарафыннан табигатнье сакларга кирәклеге турында нәтиҗә чыгара белүчәнлекләрен үстерү максатыннан 7-11 сентябрь көннәрендә "Туган Татарстаным. Яшеллеккә күмелгән туган илем" атналыгы үткәрелде. Атна дәвамында алган белемнәрен балалар сынлы-сәнгать эшчәнлегендә киң чагылдырдылар. Йомгаклау чарасы итеп уртанчылар, зурлар, мәктәпкә әзерлек төркеме балаларының эшәреннән күргәзмә оештырылды.

Көз

Ни арада җәй үткән,

Алтын көз килеп җиткән .

Җимешләр өлгергәч, бакча

Бигрәк тә матур икән!

Алмалар әй уңганнар,

Кызарышып тулганнар,

Балга манып алганмыни,

Шундый татлы булганнар.

Әй ямьле дә урманда

Кояш карап торганда.

Тиен уйный сикереп,

Гөмбә утыра көлеп.

Резеда Вәлиевама

Мәктәпкә әзерлек төркеме балалары тәрбияче Гүзәл Гәбделхәй кызы белән берлектә кисеп-ябыштыру эшчәнлегендә "Туган ягыма көз килде"  темасына композиция төзеделәр.

Бүген бакчабызда озак еллар эшләүче Рузилә Сәгыйть кызының олы бәйрәмен, 55 яшьлек юбилеен билгеләп үтү, котлау өчен Саба муниципаль районы Башкарма комитеты мәгариф бүлеге профсоюз комитеты рәисе Шәмсевалиева Айгөл Маратовна һәм әйдәп баручы белгеч Гумерова Луиза Мәжитовна килделәр. Рузилә Сәгыйть кызын тәбрикләп Мактау Грамотасы һәм истәлекле бүләк тапшырдылар.

Кадерле Рузиля Сагыйтовна !

Сине олы бәйрәмең — 55 яшьлек юбилеең белән чын күңелдән котлыйбыз. Сиңа нык сәламәтлек, күңел тынычлыгы, гаилә шатлыгы, кайгы-хәсрәтсез көннәр, ак бәхетләр, балаларыңның һәм оныкларыңның күңел җылысын тоеп, игелекләрен күреп, бәхетле озын гомер кичерүеңне телибез. Киләчәгең җыр кебек матур, кояш кебек якты булсын. Туачак таңнарың һәрвакыт нурлы, күк йөзең һәрвакыт аяз булсын. Гел шулай елмаеп, кешеләрне сөендереп яшә!

Һәр яңа көн бәхет алып килсен,

Алсу таңнар күмсен шатлыкка.

Яшәү дәрте янсын йөрәгеңдә,

Картаерга һич тә ашыкма.

Парклар һәм скверлар елы территорияләрне комплекслы үстерү, төзекләндерү һәм яшелләндерү мәсьәләләренә җәмәгатьчелек игътибарын җәлеп итү максатыныннан чыгып игълан ителгән иде. Байлар Сабасының "Олимп" стадионы тирәсен ямьләндерү, өлкәннәр һәм балалар өчен ял урыннарын булдыру буенча җәй буе эш алып барылды. Бүген 5 сентябрь көнне «Парклар һәм скверлар көне" уңаеннан Байлар Сабасында бәйрәм чарасы булып узды. Мәктәпкәчә яшьтәге балалар арсында йөгерү буенча ярышлар үткәрелде. Ярышның төп максаты балаларга кече яшьтән сәламәт яшәү рәвеше алып баруны төшендерү, спорт белән даими шөгыльләнеп җәмгыятькә көчле рухлы шәхесләр тәрбияләү, үстерү. Безнең "Шатлык" балалар бакчасынан зурлар, мәктәпкә әзерлек төркеме балалары актив катнаштылар. Йөгерештә катнашкан һәр балага  бүләкләр тапшырылды һәм бәйрәм истәлекле фотога төшү белән тәмамланды. Ярышта катнашкан һәр балага, әти-әниләргә, хезмәттәшләребезгә рәхмәтебезне җиткерәбез. Киләчәктә уңышлар теләп калабыз.

Балаларны кече яшьтән спорт, мәдәният, фән өлкәләре белән таныштыру, аларга карата кызыксыну уяту, һәрьяклап аң-белемнәрен үстерү, рухи яктан бай шәхес итеп тәрбияләү буенча бакчабызда күп кырлы эш алып барыла. Танылган, талантлы шәхесләр белән очрашып аларның казанышлары белән таныштыру, алар кебек тырыш, түзем, кызыксынучан булырга кирәклеген төшендерү иң әһәмитяле чара. Мондый очрашуларны безнең бакча коллективы даими үткәреп тора. Балаларны сәламәт яшәү рәвеше белән таныштыру, спорт һәм физкультура белән шөгыльләнергә кече яшьтән күнектерү максатыннан үзебезнең бакчада тәрбияләнеп үскән Олимпия чемпионы Рушан Миннегулов; тхеквондо түгәрәген алып баручы Ахмитшин Ренат, нәфис гимнастика түгәрәген җитәкләүче Ахмитшина Алисәләр очрашулар оештырылды. "Сәламәт булыйм дисәң?", "Чисталык зур байлык", "Сәламәт тәндә, сәламәт акыл" темаларына спорт бәйрәмнәре, ярышлар, хәрәкәт активлыгын үстерүче уеннар үткәрелә. Балаларны фән, белем өлкәсе белән тирәнтен таныштыру максатыннан Сабаның сәләтле балалар мәктәбе, Гимназия белән тыгыз элемтәдә эш алып бара. Укучы балалар, укытучылары белән килеп тәҗрибәләр күрсәтәләр, мәктәп тормышы белән таныштыралар. Иҗади - сәнгать, мәдәният белән таныштыру буенча Балалар иҗат үзәге, музыка мәктәбе, район мәдәният йорты белән хезмәттәшлек итәбез, экскурсияләргә, музыка мәктәбендә белем алучы балаларның иҗат концертларына барабыз. Бүген өченче сентябрь көнне бакчабызга Сабаның танылган шәхесе, гармунчыларның Фәйзулла Туишев исемендәге премия лауреаты Вилорик ага Валиуллинны чакырдык. Ул үзенең тормыш юлы, ничек гармуннар белән кызыкснып китүе турында балаларны таныштырды, тальян, хромка гармуннарында, баянда татар халкының танылган көй-моңнарын уйнап күңелне күтәрде. Кызыксынган һәр бала тырышып даими шөгыльләнгәндә уңышка ирешә алуын аңлатты. Бүгенге көндә сәләтле, талантлы, тырыш кешегә үсеп, ачылып китәргә мөмкинлекләр күп булуын төшендерде. Очрашу балаларның Диләрә Илдусовна белән берлектә әзерләгән концерт номерлары белән үрелеп барды.

Исәнме, саумы, сентябрь –

Безнең яңа ел!

Синнән башлана тормышка

Якты, яңа юл!

Бүген уртанчылар, зурлар, мәктәпкә әзерлек төркеме балалары тәрбияче Гүзәл Габдулхаевна, музыка җитәкчесе Диләрә Илдусовна белән берлектә 1 Сентябрь - белем бәйрәме уңаеннан күңелле, матур чара үткәрделәр. Мәктәпкә әзерлек төркеме балалары бер елдан мәктәпкә китүләре, бакчада үткәргән һәр көннәрен, шатлыклы мизгелләрен киләчәктә сагынып искә алачакларын шигьри юлларда иптәшләренә җиткерделәр. Бәйрәм җыр, бию, уеннар белән үрелеп барды. "Мәктәп - белем чишмәсе" темасына презентация күрсәтелде.

Белем бирү өлкәсендә хезмәт куючы һәр хезмәткәрне яңа уку елы башлануы белән чын күңелдән котлыйбыз. Сәламәтлек, күңел тынычлыгы, яңадан-яңа уңышларга ирешеп эшләүләрен теләп калабыз.