Бүген бакчабызда татар халкының милли бәйрәме Сабантуй үткәрелде. Балалар музыка җитәкчесе Гөлнара Илдусовна, тәрбиячеләр Дания Әминовна, Гүзәл Габдулхаевна, Гөлназ Сөләймановна, Рәзилә Вазыйховналар җитәкчелегендә бирнә җыеп, татар халкының: капчык киеп сикерү, йомырка тотып йөгерү, су ташу, чүлмәк вату, аркан, таяк тартышу һ.б. уеннарын уйнадылар. Бәйрәм җыр, бию,нәфис сүз белән үрелеп барды. Балалар үзара өлгерлектә, җитезлектә, кыюлыкта, батырлыкты көч сынаштылар, бәләкләр алып күтәренке рухта төркемнәргә таралыштылар.

Сабан туе, Сабан туе,

Без бакчада уйныйбыз.

Ярышабыз, узышабыз,

Матур җырлар җырлыйбыз.

Билгә сөлге салабыз да

Көрәшергә чыгабыз.

Әле батыр булмасак та,

Үскәч чынлап егарбыз.

Иң өлгерләр, иң җитезләр

Бүләк яулап алалар.

Бөтен җирдән җыелганнар

Сабантуйга балалар.

Сабантуймы, Сабантуй –

Уеннар туе бит ул,

Тәм-томнар сые бит ул,

Җиңүләр уе бит ул.

Чаптар өстендә чабып,

Катыктан тәңкә табып,

Колга башына менеп,

Узышлыга йөгереп Һәм татарча көрәшеп,

Аркан белән сөйрәшеп,

Ватмый йомырка ташып,

Тапкырлыкта сынашып

Җиңсәң әгәр,

Сабантуй –

Эчкә шатлык

сыймас туй!

Җилферди чиккән сөлгеләр.

Бүләкләр – күбебезгә!

Көрәшик тә, узышыйк та –

Сабантуй бүген бездә!

Бүген бакчабызда  "Минем бәхетле балачагым" атналыгы барышында  уртачылар, зурлар, мәктәпкә әзерлек төркеме балалары катнашында "Бәхетле балачак" исеме  астында  бәйрәм иртәсе үткәрелде. Балалаларны яклау көненә багышыланган җырлар, шигырьләр яңгырады, матур биюләр башкарылды. Бәйрәм асфальтка төсле акбурлар белән рәсем ясау, уен майданчыкларында төрле уеннар уйнату, эстафеталар үткәрү, ярышлар  белән дәвам итте. Балаларның шат авазлары, күтәренке кәефләре тирә-юньне яңгыраттып, тагы ямьләндереп торды.

Җәйнең беренче атнасында асфальтка рәсем ясау матур бер гадәткә әверелде. Балалар  төсле акбурлар ярдәмендә үзләренең уй-фикерләрен, матур теләкләрен  тирә-юньдәгеләргә җиткерәләр. Киләчәк тормышның якты, матур, тыныч, бәхетле, куанычлы булуын күзаллыйлар.

Бездә бәйрәм!Бездә бәйрәм!

Менә шуңа күрә без.

Шатланабыз, сөенәбез,

Елмаябыз, көләбез.

Гади бәйрәм түгел бүген,

Ул гомергә бер килә.

Бүген менә бакчабызга,

Дуслар, туганнар килә.

Олы бәйрәм бүген бездә,

Зурлар инде күбебез.

Бакча белән хушлашабыз,

Бүген соңгы көнебез.

Бакча белән саубуллашу көне –

Ул гаҗәеп моңсу, сагышлы.

Шундый көн бу – олы бәйрәм үзе,

Үзгәртә дә куя кәефне.

Бәйрәмне ямьләндереп әкият геройлары Буратино, Базилио, Алиса, төгәл Математика, Әлифба килделәр. Балалар кунакларның төрле биремнәрен, табышмакларын чишеп белем иленә сәяхәт кылдылар. Балалар бакчасындагы барлык хезмәткәрләргә балалар шигъри юллар аша рәхмәтләрен җиткерделәр. Бәйрәм матур биюләр, бакча белән хушлашу җырлары белән үрелеп барды. Мөдир Исрафилова Миләүшә Корбанглиевна балаларны шушындый истәлекле бәйрәмнәре белән котлады. Тормыш юлының беренче баскычын үтеп, икенче баскычы мәктәпкә китәрүләрен билгеләп үтте. Киләчәктә балаларның сау-сәламәт, акыллы, тәртипле, инсафлы, шәфкатьле, миһербанлы булып, бер-берсенә ярдәмләшеп торуларын, зур уңышларга ирешеп әти-әниләрне, бакчадагы апаларны сөендереп торуларын теләде һәм беренче сыйныфка баручыларга әзерләнгән махсус бүләкләрне тапшырды.