Гаилә-тормышыбыз нигезе. Гаилә нык, тату икән, дәүләт тә нык, тату дигән сүз.Һәр кеше бәхетле гаилә корырга омтыла. Бәхетле гаилә төшенчәсен без ничек аңлыйбыз соң? Ул борынгы гореф-гадәтләрне саклый, яңаларын булдыра белүдә, көндәлек тормыш ыгы-зыгыларында үзара мөнәсәбәтләрнең матурлыгын саклауда, һәр эшне теләп, яратып башкарырга күнегүдә, үз өеңдә башкаларныкыннан аерылып торган рухи халәт урнаштыруда, буш вакытны файдалы итеп оештыруда һәм башка бик күп сыйфатларда чагылыш таба. Гаиләдәге әлеге җылылыкны, әлбәттә, безнең әниләр, дәү әниләр саклыйлар.
Гимназиянең 4 “А” сыйныфы дәү әниләрен кадерләп,яратып, үзләренең “Өебезнең нуры ул, барыбыздан олы ул” дип аталган сыйныф сәгатенә чакырдылар. Укучылар дәү әниләре турында сөйләделәр, аларга олы рәхмәтләрен, хөрмәтен белдерделәр. Җылылык, яратуга тулы әлеге сыйныф сәгате бик күңелле үтте. 

Әниләр – илгә батырлыкны, җиргә матурлыкны бирүчеләр. Алар хакында күпме генә дан җырласак та, нинди генә рәхмәт сүзләре әйтсәк тә, аз булыр сыман тоела. «Әнкәйләрнең бөеклеген яши-яши аңлыйбыз», дип җырлана бит җырда да. Әлеге хөрмәт бер көнлек кенә түгел, ә гомерлек булырга тиешлеге һәркемгә мәгълүм.
Бүген бездә әниләргә багышланган сыйныф сәгате үтте. 4 “В” сыйныфы укучылары белән әниләрнең бала өчен иң якын кеше булуы, ана белән бала арасындагы мөнәсәбәтләр турында сөйләшү алып барылды. Укучылар үзләренең әниләре турында да яратып сөйләделәр, әниләрнең иң гүзәл сыйфатларын атадылар. Аларга ана хәстәрлеге һәм сабырлыгы белән доньяда иң зур һәм нык ныгытма – гаилә төзелә икәне аңлатылды. Димәк, Туган илебез киләчәге дә алар иңендә. Балалар әлеге дәрестән чиксез хөрмәт, мәхәббәтләрен белдерү, җиңел булмаган тормышы, хезмәте алдында баш ию һәм үзләренең күңел яктылыгын бүләк итү – аларның әниләре алдында куелган бурычлары икәнен аңладылар.

Музей – ул хәтирәләр сандыгы. Шуның өчен, музейлар нигә кирәк булуы турында сораулар бары тик бер генә нәтиҗә ясарга мөмкинлек бирә – киләчәк буыннар истә калдырсыннар, белсеннәр, сакласыннар, кадерләсеннәр өчен. Музейлар алар – тарих. Олылар да, балалар да, тулаем алганда һәркем үткәнен белмичә, яхшы киләчәк төзи алмаячаклары турында истә тотарга тиешләр.
Укучыларга да әлеге фикерне җиткереп, музейларга еш алып барабыз. 22 ноябрь көнне дә 7 “В” сыйныфы Г.Тукай музеенда булып кайтты. Алар шагыйребезнең тормышы, иҗаты белән якыннанрак таныша алды. Әдипнең шәхси әйберләре балаларны тагын да кызыксындырды, үзләре дә сизмәстән алар Тукай яшәгән дәвердә дә “булып кайттылар”.
Татар шигърияте классигы Габдулла Тукай татар әдәбияты тарихына яңа милли шигърияткә һәм хәзерге татар әдәби теленә нигез салучыларның берсе буларак кереп калды. Укучылар да шундый бөек әдипләребезне онытмасыннар иде.

Сүзлек – ул гади китап кына түгел, ул тел үсешенә нәтиҗә ясый һәм аңа киләчәккә юллар сала, һәркемгә тел байлыгын үстерергә ярдәм итә. Ә 22 ноябрьдә Сүзлекләр һәм энциклопедияләр көне билгеләп үтелә. Нәкъ менә шушы көннең сайлануы һич кенә дә очраклы түгел. 22 ноябрь – 200 мең сүзне эченә алган рус теленең аңлатмалы сүзлеген төзегән Владимир Иванович Дальнең (1801-1872) туган көне.
Әлеге көн безнең өчен дә зур вакыйгаларның берсе. Шуңа да гимназиябездә Сүзлекләр һәм энциклопедияләр көненә багышланган чара үтте. Башлангыч сыйныф укучылары сүзлекләр,энциклопедияләр турында күп кенә мәгълүмат алдылар, алар белән якыннанрак таныштылар, чөнки әлеге әсбаплар балаларга әле алга таба кирәк булачак, киләчәктә ярдәм итәчәк.

21 ноябрь көнне безнең гимназиябездә Казан шәһәренең мәгариф оешмалары директорлары урынбасарлары өчен “Мәгарифтә инновацион проектлар белән идарә итү” темасына семинар узды. Биредә безнең директор Шәмсиева Г.Г., директор урынбасарлары, укытучылар чыгыш ясадылар. Гимназиядә эшли торган проектлар (“Белем сыйфаты рейтингы”, “Тәрбия эше рейтингы”, “Җәяүле экскурсияләр үзәге”, “Радио-газета”, “Музыкаль тәнәфес” һ.б. проектлар) барысы да кызыклы, бүгенге көн өчен актуаль мәсьәләләрне чишәләр, шуңа да әлеге чыгышлар беркемне дә битараф калдыра алмады.

2019 елның 1 октябреннән II Халыкара “Җәлил укулары” әдәби бәйгесенә старт бирелгән иде. Бәйге 7 номинациядән гыйбарәт: М.Җәлил шигырьләре татарча, русча, дөнья телләрендә, Яшь җәлилчеләр (катнашучылар Бөек Ватан сугышы турында: сугыш чорына кагылышлы вакыйгалар, фронтовиклар, тыл хезмәтчәннәре турында һәм башкалар) үзләре язган әсәр белән чыгыш ясый.
Шулай ук бу елдан яңа номинацияләр дә өстәлә. Татар милләтеннән булган фронтовик язучылар әсәрләрен башкару. Әлеге номинациядә катнашучы үзенең туган төбәгеннән чыккан язучы-фронтовик әсәрләрен тәкъдим итәргә тиеш. Бу номинациядә татар һәм рус телендә чыгыш ясарга мөмкин. Күмәк башкаручылар өчен дә номинация булдырылды һәм бәйгедә татар милләтеннән булган фронтовик язучыларның әсәрләрен татар һәм рус телендә башкарырга мөмкин.
2019 елның 8 ноябрендә әлеге конкурсның Идел буе һәм Вахитов районнарының фронтовик язучыларның тормышы һәм иҗаты белән кызыксынучы шигърият сөючеләр һәм аны яратучылары арасында район этабы оештырылды. Гимназиябез укучылары да биредә актив катнаштылар. 4 “А” сыйныфы укучысы Ахмадуллина Мәдинә “Җәлил дөнья халыклары телендә” номинациясендә 1 урын яулады һәм шәһәр этабына чыкты. Шулай ук әлеге номинациядә 3 “Б” сыйныфы укучылары – Хасанова Азалия, Мингазова Далия – дипломантлар, ә Муллагалиева Зилә 3 урын алды. “Фронтовиклар татар телендә” номинациясендә 4 “А” сыйныфы укучысы Абдуллина Зәлинә 3 урынга лаек булды.
Укучыларны әлеге уңышлары белән котлыйбыз һәм тагын да зур үрләргә ирешүләрен телибез.

Укучылар мәктәптә уку дәверендә үзләрен төрле юнәлешләрдә сынап карарга тиеш. Шуның ярдәмендә алар үз сәләтләрен ача һәм үстерә алалар.
Гимназиябездә бәйгеләрдә, чараларда катнашып, урыннар алучы укучылар күп. Шулардан 3 “Б” сыйныфы укучылары - Хасанова Азалия һәм Муллагалиева Зилә татар телендә булган бәйгеләрдә бик актив катнашалар. Бу елны аларның иҗат җимешләре – шигырьләре “Сабантуй” балалар журналында басылып чыкты. Укучыларны әлеге зур уңышлары белән котлыйбыз һәм яңа үрләр яулауларын теләп калабыз!
 

2017 елның 17 апрелендә Федерация Советында узган «мәгълүмат киңлегендә балаларның иминлеген һәм үсешен тәэмин итүнең актуаль мәсьәләләре» парламент тыңлауларының карарлары һәм Россия элемтә министрлыгының 27.02.2018 ел, №88 боерыгы белән расланган 2018-2020 елларга балаларның мәгълүмати куркынычсызлыгы концепциясен гамәлгә ашыру чаралары планы нигезендә, 2019 елның 18 ноябрендә гимназиябездә “Интернет” челтәрендә куркынычсызлык турында бердәм дәрес узды.
Бердәм дәрес балаларның мәгълүмати куркынычсызлыгы дәрәҗәсен күтәрүгә юнәлтелгән чаралар циклы булып тора һәм ата-аналар һәм педагогик җәмәгатьчелекнең игътибарын мәгълүмат киңлегендә балаларның иминлеген һәм үсешен тәэмин итүгә юнәлдерелә.

Гимназиябездә, балаларга татар милләтенең күренекле шәхесләре турында тирәнрәк мәгълүмат бирү һәм укучыларда кызыксыну уяту максатыннан, “Музыкаль тәнәфес” проекты эшләп китте. Бу көннәрдән башлап бездә бөек шәхесләребез язган көйләр яңгырый, моң агыла. Тәнәфес вакытында укучылар көн саен төрле татар композиторлары турында белә һәм аның иҗаты белән таныша ала. 

Ата-аналар укуы традицияләрен торгызу юлы белән балаларга белемле балачак тәэмин итү максатыннан, 2019 елның 1 октябреннән 30 октябренә кадәр «Укый торган ана – укучы ил» республика конкурсы үткәрелде. Биредә “Әни язган иң яхшы әсәр” номинациясе буенча безнең гимназиябезнең 7 “В” сыйныфы укучысы Салахатдинова Сагдананың әнисе – Салахатдинова Ләйсан Наил кызы җиңү яулады. Алар бергә “Крошечные истории” дип аталган китап эшләгәннәр иде. Әнисе әсәрләрен язса, кызы аларга иллюстрацияләр ясый. Бергә эшләгән иҗат җимеше бик уңышлы килеп чыга: китап эчтәлеге ягыннан да, дизайн ягыннан да бик кызыклы.