Математика һәм информатика декадасы кысаларында, Резеда Рашатовна җитәкчелегендә, башлангыч сыйныф укучылары бик матур ребус ясаганнар иде. Әлеге ребус стена газетасы форматында икенче катта эленеп тора.
Кадерле укучылар! Актлар залы янында эленгән әлеге ребусларны чишәргә чакырабыз. Нәкъ менә сезгә иң авыр, кызыклы, катлаулы ребус авторын билгеләргә тәкъдим итәбез. 

Бүген, 6 нчы ноябрь көнне, гимназиядә “Татар теле һәм әдәбияты дәресләрендә педагогик технологияләр” исемле семинар оештырылды. Әлеге семинар “ФГОС ОО шатларында заманча татар теле һәм әдәбияты дәресе” исемле өстәмә һөнәри квалификация күтәрү программасы кысаларында узды.
Килгән кунакларга 1 нче Татар гимназиясе турында фильм күрсәтелде, музейга экскурсия оештырылды. Шулай ук, 4 сыйныфта татар теле һәм әдәбияты фәннәреннән ачык дәресләр күрсәтелде. Башлангыч сыйныф укытучылары Фәридә Фәимовна, Земфира Нурисламовна, татар теле һәм әдәбияты укытучылары Гөлүзә Азатовна һәм Лилия Мәгъфүровна әлеге педагогик технологияләрне уңышлы куллану үрнәкләрен күрсәттеләр. Һәр укытучы үз эшчәнлегендә заманча технологияләр кулланырга тырышкан иде. Татар теле һәм әдәбияты укытучысы Эльмира Рөстәмовна проект эшчәнлеге буенча мастер-класс күрсәтте.
Әлеге семинар укытучылар өчен файдалы булгандыр дигән теләктә калабыз! Ә гимназия укытучыларына, гимназия исеменнән, яхшы, кызыклы дәресләр, мастер-класслар күрсәткәннәре өчен рәхмәт белдерәбез!

Бүген, 5 нче декабрь көнне, педагог-оештыручылар, 5 нче сыйныфларны тимер юлларда үз-үзеңне тоту кагыйдәләре белән таныштырдылар. Педагог-оештыручылар нинди җирләрдән тимер юл аша чыгарга, нинди кагыйдәләрне үтәргә, наушниктан музыка тыңлау, күңелсез нәтиҗәләргә китерүче төрле хәлләр турында сөйләделәр, ә укучылар куелган сорауларга җавап бирергә тырыштылар.
Укучылар инструктаж ахырында түбәндәге нәтиҗәләргә килделәр: үзеңне тимер юл янында ничек тотуың, алдагы бөтен гомереңне билгели. Кеше үз гомерен, сәламәтлеген кайгыртырга һәм башкаларга да игътибарлы булырга тиеш.
Кадерле укучылар! Тагын бер кат искәртеп үтәбез: юлларда сак һәм игътибарлы булыгыз!

30 нчы ноябрь көнне, 6 нчы сыйныфлар Татарстан Республикасының Милли музеенда экскурсиядә булып кайттылар. Укучылар борынгы гасырлардан алып бүгенге көнгә кадәр, ерак бабаларыбыз тормышы һәм Татарстан тарихы белән таныштылар. Кызыклы, тарихи, чын экспонатлар аша борынгы кешеләрнең көндәлек тормышы белән таныштылар.
Укучылар кул эшләнмәләре, эш кораллары һәм ау өчен кирәк яраклар, борынгы кешеләрнең киемнәре һ.б. әйберләрне күреп тәэсирләнделәр. Укучылар сүзләренә караганда, аларга иң ошаган экспонатлар: хайваннар карачкылары, хәрби киемнәр, Екатерина II каретасы булган.
Әлеге сәяхәт укучыларны таң калдырган. Кызыклы экскурсиядән алган тәэсирләр укучылар күңелендә әле озак сакланыр. 

“Яхшылык җир буйлап атлый” исемле рәсемнәр бәйгесе дәвам итә. Бәйге мөмкинлекләре чикләнгән кешеләргә багышланган. Укучылар инде матур-матур эшләр тапшыра да башладылар. Тапшырылган рәсемнәр арасында буяулар һәм төсле карандашлар белән ясалган рәсемнәр бар. Ә кайбер укучылар, хәтта, токмачлар, борчаклар һәм ярмалар да кулланганнар.
Кадерле укучылар! Сездән матур, фантазияле рәсемнәр көтеп калабыз. Форматы А3 булган барлык яхшылык турындагы рәсемнәрне бәйгегә кабул итәбез!

Бу атнада күп итеп кар яву сәбәпле, гимназия территориясен кардан чистарту эше башланып китте. Югары һәм урта сыйныф укучылары, билгеләнгән график буенча, юлларны кардан арындырырга ярдәм итәләр. Әлеге эш гимназиянең матур йөзен саклау, укучылага, укытучыларга һәм әти-әниләргә мәктәп территориясендә йөрергә уңайлы булсын өчен эшләнә. Шулай ук, укучыларны физик эшкә өйрәтү, саф һавада шөгыльләндерү өчен дә бик кулай.
Гимназиягә ярдәм иткән әлеге көчле, тырыш егетләребезгә, гимназия исеменнән, рәхмәт белдерәбез! 

Бүген, 5 нче декабрь көнне, 3 нче сыйныфлар мәктәп музеенда экскурсиядә булдылар. Экскурсоводлар 9 нчы сыйныф укучылары иде. Өлкән абый-апаларының кызыклы, мәгълүмати сөйләмен тыңлау нәни укучыларыбызга бик ошады. Алар бер үк вакытта сокланып та, горурланып та, кызыксынып та гимназия тарихын тыңладылар.
Бигрәк тә аларга мамонт сөякләре, борынгы йорт экспонатлары, Г. Тукай белән бәйле әйберләр бик ошаган.
Шундый матур, якты, заманча музеебыз булу белән без бик горурланабыз! 

29 нчы ноябрь көнне, 8 нче сыйныфлардан торган ЮДПД отряды, җитәкчеләре Әхмәдиева З.А. җитәкчелегендә, Янгын куркынычсызлыгы музеенда экскурсиядә булдылар. Әлеге сәяхәтнең максаты: янгын вакытында балаларның куркынычсызлыгын тәэмин итү һәм үлем очракларын булдырмый калу өчен кагыйдәләр белән танышу.
Бу көнне укучылар янгын сүндерүче хезмәте белән якыннан таныштылар. Тагын бер кат куркынычсызлык кагыйдәләрен искә төшерделәр. Әлеге экскурсия укучыларга бик күп файдалы мәгълүмат бирде.
Кадерле укучылар! Ут белән сак булыгыз! Үзегезнең һәм башкаларның тормышын куркыныч астына куймагыз!

Әлеге көннәрдә гимназиядә халыкара мөмкинлекләре чикләнгән кешеләр көненә багышланган чаралар уза. Барлык сыйныфларда сыйныф сәгатьләре үткәрелә. Укытучылар балаларны, әлеге сыйныф сәгатьләрендә, үзенчәлекле кешеләр тормышына бәйле төшенчәләр белән таныштыралар.
Бу тема бигрәктә кече сыйныфларны кызыксындыра. Нәкъ менә башлангыч сыйныфта дөрес тәрбия һәм юнәлеш алу, киләчәктә гуманлы, кешелекле, ярдәмчел, җәмгыятькә файдалы кешеләр тәрбияләргә ярдәм итә.
1 нче сыйныфлар “Цветик-семецветик” исемле мультфильм карадылар “Яхшылык йөри җиребездә” темасына рәсемнәр ясадылар.
Укучылар мондый кешеләрнең бездән берни белән дә аерылмавы, бары тик, мөмкинлекләре бераз чикләнүен, аларга ярдәм кулы сузарга кирәк икәнлеген аңладылар. 

Укучыларыбыз бик яратып мәктәп китапханәсенә йөриләр. Укытучылар һәм китапханәче, беренче сыйныфта ук, укучыларны китапханәгә алып кереп, махсус танышу дәресләре оештыралар. Анда матур китаплар уку, журналлар карау, оештырылучы төрле чараларда катнашу укучыларга бик ошый.
Анжелика Евгеньевна җитәкчелегендәге, 2 нче В сыйныфы да әлеге чаралардан читтә калмый. Алар китапханәгә багышлап, үзләрен кызыксындырган темага стена газетасы эшләделәр. Аларның иң матурлары китапханә диварына эленде.
Шундый актив, кызыксынучан укучыларыбыз булу белән без горурланабыз. Алга таба да аларга иҗади уңышлар телибез!