"Ел укытучысы -2017" конкурсының мәктәп этабы үтте. Шул кысаларда ачык дәресләр каралды. 1 нче сыйныф укытучысы Сафина Резеда Рашат кызы, 2 нче сыйныф укытучысы Гатауллина Гөлназ Рахиман кызы, тарих укытучысы, яшь мөгаллим, Хәкимҗанов Фәнис Хәбир улы үз дәрәҗәсендә  дәресләр күрсәттеләр.

Башлангыч сыйныфлар укытучысы Борханова Римма Нурмөхәммәт кызы 1-4 нче сыйныф укучылары белән берлектә Бала хокукларын яклау Конвенциясе турында ачык тәрбия сәгате үткәрде. Ул балаларга Закон , балаларның хокуклары һәм бурычлары турында аңлатты. Укучылар сорауларга җавап эзләделәр, проект эшләре башкардылар. Төркемнәрдә, индивидуаль эшләрдә төрле эшләр эшләделәр.

Сафина Резеда Рашат кызы 1 нче сыйныфта Әлифба фәненнән ачык дәрес күрсәтте. Дәрес төгәл, бик уйланып әзерләнгән иде. Укучылар өйрәнгән хәрефләре белән иҗекләп тә, аерым -аерым да укый белүләрен күрсәттеләр. Проект эшен дә эшли беләләр. Дәрес бик җанлы үтте.

10 нчы ноябрь көнне мәктәптә ата- аналар җыелышы булды. Көн тәртибендә 1 нче чирек нәтиҗәләре. Галиева Р.Р. " Укучыларның экологик культурасын үстерү һәм табигатькә карата сакчыл караш тәрбияләү" дигән темага чыгыш ясады. Укыту эшләре буенча директор урынбасары Ганиева Л.Ф. 1 чирек, контроль эш  нәтиҗәләре белән таныштырды.  Директор  Хәкимҗанов Х.Г. ашау мәсьәләсе, укуга караш, дәрес  калдыру, тәртип, дәрестән тыш түгәрәкләр эшчәнлеге һәм өстәмә дәресләр турында аңлатты. Шулай ук ата - аналар балаларының сыйныф җитәкчеләре белән дә әңгәмә алышты.

6-11 нче ноябрь аралыгында "Сделано с заботой" бөтенроссия акциясе үтте.Мәктәбебез укучылары бу акциядә теләп катнашты.Үзләре ясаган җимлекләрне яраткан кошларына куйдылар, күп итеп җим салдылар.

10 нчы ноябрьда район мәктәпләре арасында Бадминтон ярышы узды. Безнең мәктәпнең егетләр һәм кызлар командасы да бу ярышта катнашты. Куанырлык уңышлар да бар. Кызларыбыз район буенча 3 нче урында. Котлыйбыз!

Үткән атнада башлангыч сыйныф укучыларының атналыгы үтте. Атналык бик файдалы булды. Укучылар көз турында рәсемнәр ясадылар, китапчык чыгардылар. Проект эшчәнлеге җәелдерелде.  1 нче сыйныф укучылары сыйныф җитәкчеләре Сафина Резеда Рашат кызы белән берлектә  "Ел фасыллары" темасына ачык тәрбия сәгате күрсәттеләр. Тәнәфесләр гөр килеп торды. Вожатыйлар белән берлектә төрле уеннар, җыр конкурслары, бию һәм башваткычлар үрелеп барды. Укучылар бик канәгать калдылар.

  Мәктәбебездә шау - гөр килеп, көзге муллыкка шатланып "Уңыш бәйрәме" үтте.  Бәйрәм ике этапта булды. Башлангыч сыйныф укучылары һәм 5 - 11 нче сыйныф укучылары катнашында. Бәйрәм үз дәрәҗәсендә узды. Шундый мул итеп әзерләнгән өстәлләр күзнең явын алырлык иде. Һәр сыйныф үз өстәлен яклады. Барысы да  фантазия ярдәмендә, барлык мөмкинлекләрне кулланып әзерләнгән иде. Аннан соң концерт номерлары тезелеп китте: җыр, бию, скетч. Ә соңыннан дискәтүк. Укучылар чын мәгънәсендә ял итте, күңел ачтылар.

Узган атнада   район күләмендә Россия укучылар хәрәкәте үзенең чираттагы у утырышын үткәрде.   Үзенең сафына яңа активистлар кабул итте. Мәктәбебезнең 5 нче сыйныф укучылары бик теләп утырышка бардылар. Үзләрен горур тоткан хәлдә, ант биреп бу оешма сафларына бастылар.  Бу чара бик  дулкынландыргыч булды.  Олы буын укытучылар үзләре дә комсомол сафларына кергәннәрен тагын бер кат искә алдылар.  Укучылар алда эшләнәсе эшләрдә актив катнашырга сүз бирделәр.