Федераль дәүләт белем бирү стандартлары буенча белем алган 5 нче сыйныф укучылары үзләренең белемнәрен, логик фикерләүләрен, төп фәннәрне үзләштерүләрен күрсәтү максатыннан проект эшләре эшләп, аларны әти-әниләре һәм укытучылар каршында якладылар. 

Иң беренчеләрдән булып федераль дәүләт белем бирү стандартлары буенча белем ала башлаучы 6 нчы сыйныф укучылары да үзләренең белемнәрен әти-әниләре каршында проект эше яклап күрсәттеләр. Укучылар һәрберсе төп фәннәрдән аерым тема алып, индивидуаль рәвештә әзерләнде. 

1 нче сыйныф укучылары инглиз теле укытучысы Гайнетдинова Алия Рөстәм кызы белән инглиз теленнән дәрестән тыш эшчәнлек буенча әти-әниләре каршында чара күрсәттеләр. Әлеге чарада укучылар ел дәверендә өйрәнгән җырларын җырладылар, шигырьләрен сөйләделәр һәм инглиз телендә бер-берсе белән аралашып, килгән ата-аналарны шаккаттырдылар. 

IV Республика күләм "Умники и умницы" дип исемләнгән укучылар интеллектуаль уенында мәктәбебезнең 10 нчы сыйныф укучылары Галиәхмәтова Дилә һәм Садриева Энҗе уңышлы чыгыш ясап, яхшы нәтиҗәләр күрсәттеләр. Ә Садриева Энҗе әлеге бәйгенең финал уенында катнашып, истәлекле бүләкләргә ия булды. 

2 нче сыйныф укучысы Кәлимуллина Гулия икенче ел рәттән "Укучының мәдәни көндәлеге" дип исемләнгән Республика күләм проектының дипломанты булды. Гөлия Казан шәһәренә экскурсиягә барып, бүләкләнеп кайтты. 

ФБДДС таләпләре буенча укыган башлангыч сыйныф укучылары әти-әниләре каршында зур сынау тоттылар. Алар ел буе үзләштергән белемнәрен проект эшендә күрсәттеләр. 

Мәктәбебездә тантана - "Соңгы кыңгырау" бәйрәме. Быел Күәм урта мәктәбендә 9 һәм 11 нче сыйныфның 16 укучысы өчен соңгы кыңгырау яңгырады. Аларны котлар өчен әти-әниләре, беренче укытучылары һәм Әтнә муниципаль районы финанс-бюджет бүлеге җитәкчесе Гыймадиев Фердинант Илсур улы килгән иде. 

Хөрмәтле укытучылар, укучылар, әти-әниләр! Сезне язның иң күркәм, күңелләрдә мәңгегә уелып кала торган бәйрәме "Соңгы кыңгырау" белән тәбриклибез! Сезгә алдагы тормышыгызда ак бәхетләр, тыныч, имин күк йөзе телибез! Теләгән теләкләрегез кабул булсын!

"Ашыт" спорт мәктәбе базасында районыбыз мәктәпләре активистлары өчен Татарстан Республикасының балалар оешмалары берлеге тарафыннан "Яшь гражданнар форумы" үтте. Әлеге форумда 10 нчы сыйныф укучылары Галиәхмәтова Дилә, Садриева Энҗе һәм Хабибуллин Айназ актив катнашып истәлекле бүләкләр алдылар. Ә Галиәхмәтова Диләгә Балалар оешмаларының берлегеннән мактау грамотасы тапшырылды. 

Җиңү көнен һәр кеше аерым дулкынлану белән көтеп ала. Әлеге бәйрәмнең 72 еллыгын без дә искә алырга уйладык. Бәйрәмгә Күәм җирлегендә яшәгән сугыш, тыл ветераннарын чакырдык һәм авыл советларыннан ветеран советы рәисләре дә бәйрәмебезнең олуг кунаклары булдылар. Алар укучылар әзерләгән концерт программасын карадылар, музейларыбыз эшчәнлеге белән таныштылар.