2012-2013 нче уку елы башланып китте. Быел безнең мәктәптә 118 укучыга 24 укытучы белем һәм тәрбия бирәчәк. Яңа укытучыларыбыз да бар: физкультура укытучысы - Шакиров Рафил Шамилевич, өстәмә белем бирү педагогы - Фазылҗанов Илназ Рәисович. Яңа уку елында барыгызга да уңышлар, иминлек һәм сәламәтлек телибез!
 

Бүген лагерьның соңгы көне. Көн кызыклы һәм мавыктыргыч булды. Иртәнге аштан соң укучылар “Үлгәннәрнең каберен бел, исәннәрнең кадерен бел”дип исемләнгән чарада катнаштылар. Аны тарих укытучысы Хаҗиев А.Х. үткәрде. Икенче аштан соң кече Сабантуй уздырылды. Укучылар уеннарда бик актив катнаштылар.Обед ашаганнан соң лагерь ябылышына карата концерт  куелды , флаг төшерелде. Укучылар лагерьга бик теләп йөрделәр. Хәзер инде аларны алда җәйге каникул көтә. Каникуллар күңелле үтсен!

Хәрби- патриотик атналык дәвам итә. Бүген татар теле  укытучысы Нуруллина З.Ф. “Солдатта булган диләр” дип исемләнгән чара үткәрде. Ул анда яңа гына армия сафларыннан кайткан Гыйләҗиев Илназны чакырган иде. Шулай ук презентация күрсәтелде, анда армиядән кайтмый калган, Әфганстанда хезмәт иткән солдатлар турында  мәгълүматлар  яктыртылды. Һәлак булганнарны 1 минут тынлык белән искә алдылар.Икенче аштан соң укучылар кабат бассейнга юл тоттылар.

Бүген укучылар сугыш һәм тыл ветераннары хөрмәтенә открыткалар ясадылар. Алар бу бүләкләрен бабаларына һәм әтиләренә бүләк итәчәкләр.Икенче аштан соң укучылар Саба музеенда һәм китапханәсендә экскурсиядә булдылар, үзләренә күп мәгълүмат алдылар. Обедтан соң саф һавада уеннар уйнадылар.

Иртәнге аштан соң укучылар Мусина Г.Ф. җитәкчелегендә асфальтка рәсем ясау конкурсында катнаштылар. Ул “Комик йөз” дип аталды. Иң оста рәссамнарга  бүләкләр тапшырылды.Икенче аштан соң хәрби җырлар һәм шигырьләр конкурсы уздырылды.

Бүген укучылар кабаттан Лесхозга юл алдылар. Лесхоздан кайтып,  икенче ашны ашаганнан соң  малайлар арасында “Ягез әле, егетләр” дип аталган ярыш үткәрелде.Альберт Гыйлмуллович аларны төрле конкурсларда сынады.

 Бүген лагерьда хәрби –патриотик атналык башланып китте. Иртәнге аштан соң укучылар арасында башта Олимпия уеннары турында әңгәмә, аннары “Күңелле стартлар” уены үткәрелде. Икенче аштан соң укучылар Мишә елгасы буена экскурсиягә киттеләр. Алар анда уйнап, табигать  кочагында ял итеп кайттылар.Обед ашаганнан соң  Альберт Гыйлмуллович балаларга саф һавада уйнала торган яңа хәрәкәтле уеннар өйрәтте.

Бүген укучылар Зилә Бәшировна белән белән  инглизчә җырлар җырладылар. Барлык укучыларга да бу чара бик ошады.Икенче аштан соң балалар Лесхозның урман музеена  юл тоттылар. Аннан бик тәэсирләнеп кайттылар.Лесхоздан кайтып обед ашаганнан соң, укучылар мәдәният йортына төштеләр һәм үзләренең сәхнә осталыкларын  күрсәттеләр.

 Инглиз теле атналыгы дәвам итә. Бүген Зилә Бәшировна укучылар белән инглиз телендә сөйләшүче илләргә багышланган интеллектуаль уен үткәрде.Укучылар бик актив катнаштылар һәм бүләкләнделәр.Икенче аштан соң кызлар арасында “Озын толым “ конкурсы үткәрелде.Обедтан соң укучылар шашка ярышында үзләрен сынадылар.