Мәктәбебездә шаулап-гөрләп “Көзге бал”кичәсе булып үтте. Кичәне 11нче сыйныф укучылары алып барды. Бәйрәмдә 8нче,9нчы,10нчы сыйныф укучылары катнашты. Төрле уеннарда, ярышларда көч сынашып, һәр сыйныф укучылары  үзләренең сәләтләрен, осталыкларын күрсәттеләр. Бәйрәмнең  концерт номерлары белән үрелеп баруы, аңа тагын да ямь өстәде.  Күптән көтеп алынган бу кичә һәр укучының күңелендә матур истәлек булып сакланыр.  

Бүген,  29.10.13  “Сәламәтлек турында әкият” район фестиваленең соңгы көне.  Конкурста 2-4 сыйныф укучылары катнашты.  Аларның эшләре район мәгариф бүлегенә башлангычлар белән эшләүче методист Каримуллина В.Э. тарафыннан  бәяләнәчәк.

Бүген, 28 октябрь көнне, мәктәптә янә Уңыш бәйрәме. Бу юлы бәйрәм хуҗалары 5,  6, 7 сыйныф укучылары. Алар  “Октябрь” һәм “Ноябрь” командаларына  бүленеп көч сынаштылар. Тематикага  бәйле җыр, шигырь, күңелле уеннар чараны тагын да тулыландырды. Бәйрәмдә укучыларның сәнгати осталыгы да,  дәресләрдә, дәрестән тыш эшчәнлектә алган белемнәре дә күренде. Укучыларыбыз  тиз фикер йөртүләре, бер эш төреннән икенчесенә җиңел күчә алулары белән сокландырдылар.  Бәйрәмдә үзара дуслык, бер-берләренә ярдәм итү кебек матур сыйфатлар тәрбияләнде. Уңыш бәйрәме укучыларның һәм әти-әниләрнең тырыш хезмәте белән әзерләнгән мул табын артында дәвам итте.

26 нчы октябрь көнне, 7 нче сыйныф укучысы Гыйльманова Лилия һәм 9 нчы сыйныф укучысы Кәримова Гүзәл Алабуга шәһәрендә,  технология фәне буенча  үткәрелгән, V  регионара  “Созидательный труд школьников” дип исемләнгән  конкурста уңышлы гына чыгыш ясап кайттылар. Укучылар  3 этапта уздырылган кокурста үзләренең көчләрен сынадылар. 1 этап – тест эшләү, 2 этап –практик эшчәнлек, 3 этап –иҗади конкурс.

Укучыларыбызга алга таба да уңышлар телибез.

Бүген башлангыч сыйныф укучыларының “Без көзләрне яратабыз!” дип аталган көзге бәйрәмнәре узды. Бәйрәм барышында укучылар үзләрен оста җырчылар, шигырь сөйләүчеләр, артистлар итеп таныттылар. III сыйныф укучылары тарафыннан куелган “Шалкан” әкияте күңелләргә ямь өстәде.

Балалар  Сөмбеләләрнең   төрле  авырлыктагы биремнәрен бик җиңел үтәделәр. Яфракларны да таныдылар, табышмакларга да җавап бирделәр.

Гомумән бәйрәм бик күңелле үтте һәм чәй табыны артында дәвам итте.

19 нчы октябрь көнне 10 нчы сыйныф укучысы  Шакирҗанова  Ләйлә укытучысы  Фәләхова Ф.Г. белән  КФУ үткәргән «Татарга тылмач кирәк» дигән олимпиадада  катанашып кайтты.  Ләйлә  икенче турда да сынатмады. Призлы урыннан 1 генә баллга калышты.

 Киләчәктә Ләйләгә уңышлар юлдаш булсын.

Күңелләргә якты нур өләшеп,
Шатлык өстәп һәрбер йөрәккә,
Үз муллыгы белән көзләр килә
Йомгак ясап җәйге хезмәткә.

    Алтын көз!.. Болай әйткәндә без табигатьтәге тышкы буяу-бизәкләрне генә күздә тотмыйбыз, әлбәттә. Көзнең алтынлыгы, аның кадере, барыннан да бигрәк, көзге муллык белән билгеләнә.

   Бүген мәктәбебездә башлангыч сыйныф укучылары “Көздә кунакта”исеме астында көзге байлыклардан , көз турында рәсемнәрдән күргәзмә эшләделәр. Укучыларның кул җылысы, көче куелып ясалган бу күргәзмә бик бай, матур эчтәлекле булды.

4 нче сыйныф укучылары сыйныф җитәкчеләре  Низамиева Ф.Ф. на белән берлектә авыл китапханәсенә экскурсия ясадылар. Биредә  алар балалар өчен кайткан яңа китаплар белән таныштылар, район тарихына бәйле мәгълүматлар тупладылар. Өйләрендә укыр өчен матур әдәбият әсәрләрен сайладылар. Экскурсия укучыларга ошады.

«Китапка икенче тормыш бүләк ит» акциясе  дәвам итә.  Укытучылар, балалар, ата-аналардан җыелган китаплардан китап күргәзмәсе  куелды.

   “Китапка икенче тормыш бүләк ит!” акциясе кысаларында мәктәбебездә төрле кичәләр,әңгәмәләр,очрашулар  уздыру дәвам итә.Бүген,19 октябрь көнне 5 – 11 сыйныф укучылары белән “Кадерлә син китапны!” дип аталган әңгәмәләр үтте. Шул уңайдан,айлык планга нигезләнеп  “Ничек яшисең, китап?”  рейды да үткәрелде. Укучыларның китапларын саклап тотулары китапханәче Энҗе Вазиховнаның күңеленә хуш килде.Чөнки китаплар чиста һәм тышланганнар иде.Тәрбия эшләре буенча директор урынбасары Раушания Закариевна әлеге рейдларның һәрдаим үтеп барачагына басым ясады.