Гимназиядә башлангыч сыйныфлар атналыгы дәвам итә. Бүген, 5 нче декабрь көнне, 4 нче сыйныф укучылары арасында математик брейн ринг узды. Нәтиҗәләр түбәндәгечә билгеләнде:
1 нче урын - 4 “А”;
2 нче урын - 4 “В”;
3 нче урын - 4 “Б”.
Котлыйбыз!

Бүген, 4 нче декабрь көнне, безнең гимназия укытучылары 88 нче мәктәп мөгаллимнәре белән волейбол ярышында көч сынаштылар. Әлеге турнирда безнең укытучылар 3:2 исәбе белән җиңү яуладылар. 

Спорт сөюче укытучыларыбызны җиңү белән тәбрик итәбез!

Хөрмәтле 1-4 нче сыйныф җитәкчеләре!
Менә сагындырып кыш та килеп җитте, җиргә кар ятты. Тиздән күңелле Яңа ел бәйрәме дә килеп җитәчәк.
Күп кенә гаиләләрдә, Яңа ел бәйрәменә әзерләнү вакытында башкарыла торган, төрле гореф-гадәтләр бар. Кемнәрдер үз куллары белән яңа ел уенчыклары ясый, кемнәрдер бүлмәне бизәү өчен яңадан-яңа предметлар уйлап таба. Әлеге чаралар әти-әниләр белән балаларны якынайталар, иҗати ялкын кабызалар, кул эшләренә мәхәббәт уяталар.
Барлык укучыларны Яңа ел бәйрәменә баышланган кул эшләре бәйгесендә катнашырга чакырабыз. “Тылсымлы Яңа ел” бәйгесендә түбәндәге номинацияләрдә катнашырга була:
1 нчы сыйныфлар: “Иң үзенчәлекле кар бөртеге”;
2 нче сыйныфлар: “Иң гүзәл чыршы”;
3 нче сыйныфлар: “Иң кызыклы уенчык”;
4 нче сыйныфлар: “2019 нчы ел символы”.
Эшләрне кабул итү: 11 нче декабрь көнне 6 нчы дәрестән соң, актлар залы.
Нәтиҗәләр чыгару: 12 нче декабрь. 

Башлангыч сыйныфлар декадасы дәвам итә. Бүген, 4 нче декабрь көнне, 3 нче сыйныфлар арасында, рус теле фәненнән, интерактив уен узды. Кызыклы, мавыктыргыч уеннар вакытында укучылар рус теле фәненнән белемнәрен күрсәттеләр, вакытларын күңелле уздырдылар. 

Бүген, 3 нче декабрь көнне, Билгесез солдат көне билгеләп үтелә. Әлеге дата Бөек Ватан сугышында батырларча халәк булган, ләкин шәхесе ачыкланмаган солдатларга багышлана. Сыйныф сәгатьләрендә укучылар Бөек Ватан сугышы, ул китергән югалтулар, солдатлар тормышы турында әңгәмә оештырдылар. 

Бүген, 3 нче декабрь көнне, Мөмкинлекләре чикләнгән кешеләргә ярдәм көне уңаеннан сыйныф сәгатьләре узды. Укучылар үзенчәлекле кешеләр, алар алдында килеп туган каршылыклар турында сөйләштеләр. Уеннар ярдәмендә үзләрен алар урынына куеп карадылар. Социаль видеороликлар карап, әлеге темага фикер алыштылар.
Кадерле укучылар! Истәлекле даталарда гына түгел, көн саен игелекле, олы йөрәкле, башкаларга карата игътибарлы булыйк!

Гимназиядә әниләр көненә багышланган бәйрәм чаралары уза. Бүген 3 нче “А” сыйныфында да әлеге бәйрәмгә багышланган концерт үткәрелде. Укучылар әниләренә багышлап, җырлап җырлар җырладылар, шигырьләр сөйләделәр, биюләр башкардылар. Бәйрәмгә килгән һәр әни үз баласы өчен куанып, шатланып утырды. 

Бүген, 1 нче декабрь көнне, югары сыйныф укучылары өчен биология дәресен СПИДка каршы көрәш көненә багышлап үткәрделәр. Укучылар әлеге яман чир, аннан саклану чаралары, аңа каршы көрәш турында сөйләштеләр. 

Коррупциягә тискәре караш тәрбияләү максатыннан, гимназия китапханәсендә “Намуслы булып яшәргә кирәк!” темасына күргәзмә оештырылды. Кече яшьтән үк без балаларны намуслы, кешелекле, гадел булырга ялганламаска, көчсезләрне рәнҗетмәскә, өлкәннәрне хөрмәт итәргә өйрәтәбез. Киләчәктә әлеге сыйфатлар балаларга илнең тәртипле гражданины булырга ярдәм итәчәкләр. Тәрбия процессында китаплар иң төп урынны алып торалар. Матур әдәбият укып үскән бала киләчәктә үзендә дә шул яхшы сыйфатларны булдырырга тырыша. 

Бүген, 30 нчы ноябрь көнне, әниләр бәйрәменә багышланган кичә булып узды. 2 нче сыйныф укучылары әни, дәү әниләренә концерт куйдыйлар. Әниләргә багышланган эчтәлекле, матур шигырьләр сөйләделәр, җырладылар, биеделәр, һәм әниләренә бүләк тә бирделәр.